سەعید شێرزاد زیندانی سیاسی کورد لە زیندانیی ڕەجایی شاری کەرەج بە تۆمەتی “تێکدانی کەرەستەی دەوڵەتی” لانیکەم دوو ساڵ زیندانی دیکەی بە سەردا دەسەپێ.
مانگی خەزەڵوەری ئەمساڵ، سەعید شێرزاد لەگەڵ ئیبراهیم فیروزی، ئەمیر قازییانی و سەعید پوورحەیدەر بۆ جیاکردنەوەی تۆمەتەکانیان بۆ لقی ٣ی لێکۆڵینەوەی دادسەرای زیندانی ئیڤین بردرابوون.
سەعید شێرزاد، چالاکی مافی منداڵانی کار، زیندانی سیاسی لە زیندانی رەجایی شاری کەرەج کە ماوەی ٦ ساڵ زیندانی بوونەکەی لەو زیندانە تێدەپەڕێنێ، هەتا ئێستا چەند جارێک سەبارەت بە بارودۆخی نالەباری زیندان دەستی داوەتە مانگرتن لە خواردن و بۆ ژووری تاکەکەسی گوازراوتەوە.
پاش مانگرتنی ئەم دواییانەی کۆمەڵێک لە زیندانیانی سیاسی ڕەجایی شاری کەرەج بە نیشانەی ناڕەزایەتی بە گواستنەوەی ئەم زیندانییانە لە ساڵونی ١٢ی زیندان بۆ ساڵونی ١٠ لە مانگی گەلاوێژی ئەمساڵدا، سەعید شێرزاد لەگەڵ ٧ زیندانی سیاسی دیکەی مانگرتوو بە تۆمەتی “تێکدانی نەزم و دانی دروشم دژی ڕێبەری کۆماری ئیسلامی و بەرپرسانی حکوومەتی” لە لایەن لێکۆڵەری لقی ٦ی دادسەرای گشتی٢٣ی موقەدەسی شاری تاران لە ڕێكەوتی ٣٠ مانگی گەلاوێژ بڕیاری دەسبەسەرکردنی لە زیندان هەتا کاتی دادگایی کردنەوە بۆ دەرچووە.
بەپێ سەرچاوە باوەڕ پێکراوەکان، ڕۆژی ١٤ خەرمانان حوکمی یەک ساڵ زیندانی هەڵپەسێردراوی ئەم زیندانییە لە کۆی ٥ساڵ زیندانییەوە مسۆگەر بووە و حوکمەکەش بە ٦ ساڵ زیندان پێی راگەیەندراوە و لە ئەگەری سەلماندنی ئەو تۆمەتە و بڕینەوەی حوکمەکەی، دوو ساڵ زیندانی زیادی بە سەردا دەسەپێ.
