یارمەتیەکانی خەڵکی کوردستان بۆ لێقەوماوانی بوومەلەرزەی ناوچەی کرماشان لە لایەن هەندێ لە لایەنەکانی سەر بە دەسەڵاتەوە دەدزرێن.
چالاکانی سیاسی و مەدەنیی کوردستان کە ئەم رۆژانە بە شێوازی جۆراوجۆر بە هانای لێقەوماوانی بوومەلەرزەکەی ناوچەی کرماشانەوە چوون باس لەوە دەکەن کە زۆرێک لەو یارمەتییانە لە لایەن هەندێ لە هێز و لایەنەکانی سەر بە کۆماری ئیسلامیەوە بە تاڵان دەبرێن.
بە پێی وتەی شایەتحاڵان و چالاکانی مەدەنی زۆربەی ئەو یارمەتییانە لە لایەن سپای پاسدارانەوە بۆ شوێنی نادیار و بە تایبەت بۆ ئەنبارەکانی سپای پاسداران دەبرێت.
چالاکانی مەدەنی و سیاسیی کوردستان وێڕای رەخنەی توند لەو کارەی ناوەندەکانی سەر بەدەسەڵات باس لەوە دەکەن کە تا ئێستا ئەوەی کراوە یارمەتیەکانی خەڵکی رۆژهەڵاتی کوردستان بووە و ئەو بە هاناوە هاتنەی خەڵکی کوردستان نیشان لە ئاستی بەرزی شعووری ئینسانی و نەتەوەیی خەڵکی کوردستانە.
خوسرەو مورادی چالاکی مەدەنیی شاری سەرپێڵ زەهاو کە لەم بوومەلەرزەیەدا زۆرترین خەساری گیانی و مادیی بەرکەوتووە لە بەرنامەی پرسی رۆژی کوردکاناڵدا وێڕای پشتڕاست کردنەوەی رەخنەی چالاکانی مەدەنی داوای کرد کە خەڵکی خۆبەخش یارمەتیاکانیان راستەوخۆ بە دەستی لێقەوماوان بگەیینن یا ئەو یارمەتیانە بە دەستی چالاکانی مەدەنیی جێگای باوەڕی شارەکانی سەرپێڵ زەهاو و داڵاهۆ بگەینن.
شایانی باسە کە لە چەند رۆژی رابردوودا خەڵکی کوردستان بە وەڕێخستینی کەمپەین و گرووپەکانی یارمەتیدەر هەڵمەتێکی بێ وێنەیان بە مەبەستی کۆکردنەوە و گەیاندنی یارمەتی و پێداویستیەکان بۆ لێقەوماوانی بوومەلەرزەی پارێزگای کرماشان بەڕێوەبردووە و ئەو هەروەوزە ئینسانییە هەتا ئێستاش هەر بەردەوامە.
