گیرانی ١١٢ كەس لە كرماشان بە بیانووی بردنه‌سه‌رێی ئەمنیەتی كۆمەڵایەتی

دەستبەسەركردنی هاووڵاتییانی كورد لە ماوەی چەند ڕۆژی ڕابردوودا لە لایەن ناوەندە ئینتزامی ـ قەزاییەكانەوە بە بیانووی جۆراوجۆر هەروا بەردەوامە‌و لە سەرەتای ئه‌مساڵەوە تا ئێستا ١١٢ كەس لە پارێزگای كرماشان دەستبەسەر كراون.
بەپێی ڕاپۆرتی ماف نیووز ناوه‌نده‌ ئەمنیەتییەكانی پارێزگای كرماشان لە سەرەتای ئەمساڵەوە تا ئێستا له‌ژێرناوو به‌بیانووی جێبەجێكردنی گەلاڵەی بەرزكردنەوەی ئەمنیەتی كۆمەڵایەتی‌و هاوئاهەنگییان لەگەڵ دەزگای قەزایی‌دا، ١١٢ كەسیان دەستبەسەر كردووە و بە دروستكردنی پەروەندە بۆ ئەم كەسانە بەڕێی ناوەندە قەزاییەكانیان كردوون.
سەرچاوەیەك لە هێزی ئینتزامی گوتوویەتی تۆمه‌ت‌و بیانووی گرتنی ئەوكەسانە كڕین‌و فرۆشتن‌و ڕاگرتن‌و گواستنەوەی مادەی هۆشبەر، كڕین‌و بڵاوكردنەوەی خواردنەوە ئەڵكۆڵییەكان، كڕین‌و فرۆشتنی سیگارە خاریجییەكان، كڕین‌و فرۆشتنی كەرستەی ماهوارە، دزی‌و كڕینەوەی ماڵی دزییەتی بووە.
پێشتریش لە نێوەڕاستی مانگی خاكەلێوەی ئەمساڵدا لە پارێزگای ئیلام بەهۆی ئەم بابه‌ته‌ی كە كاربەدەستانی ڕێژیم وەك بەر كردنەوەی ئەمنیەتی كۆمەڵایەتی و بەقەولی خۆیان ڕووبەڕوو بوونەوەی تاوان ناوی دێنن، هه‌رنه‌بێ ١٨ که‌س دەستبەسەرو به‌ڕێی ناوەندە قەزاییەكان كراون.
كارناسانی كاروباری كۆمەڵایەتیی لەسەر ئەم بڕوایەن كە لە ئێران، بێكاری، نەبوونی كەشی كراوەی سیاسی‌و پەرەسەندنی دژەنۆرمە كۆمەڵایەتییەكانی وەك له‌شفرۆش‌و ئیعتیاد، لە نموونەی هۆكارەكانی زۆربوونی تاوانە كۆمەڵایەتییەكان‌و هه‌روه‌ها نەبوونی ئەمنیەتی كۆمەڵایەتیی لە كۆمەڵگا دان.