خەڵکی شاروناوچە جیاجیاکانی رۆژهەڵاتی کوردستان بە خەمخۆری و سەخاوەتێکی بێ وێنە بەردەوامن لە کۆکردنەوە و گەیاندنی یارمەتی بۆ لێقەوماوانی کارەساتی بوومەلەرزەی پارێزگای کرماشان.
بەپێی ئەو هەواڵ و زانیارییانەی کە بە “کوردستان و کورد” گەیشتووە، خەڵکی سەرجەم شارە و شارۆچکەو گوندەکانی کوردستان بە هانای هاونیشتمانیانی بوومەلەرزە لێدراویان دەچن و، چەند رۆژە لە هەڵمەتێکی کوردانەو مرۆڤدۆستانە خەرێکی کۆکردنەوەو ناردنی یارمەتی و پێداویستێیەکانن بۆ بەرکەوتووانی بوومەلەرزەی شەوی ٢١ی خەزەڵوەر.
چالاکانی مەدەنی و سەرجەم ڕێکخراوە ناحکومییەکان لە یەکەم ساتەکانی ئەو ڕووداوە کارەساتبارەدا، بە ڕێکخستنی گرووپی یارمەتیدەر و پێکهێنانی کەمپەین، هەڵمەتیکی بێ وێنەیان ڕێکخستووە بۆ کۆکردنەوەی یارمەتی و هاوکاری کردنی خەڵکی لێقەوماو.
بە پێی هەواڵەکان لە سەرجەم شارەکانی رۆژهەڵاتی کوردستان بە هاوکاری خەڵک و چالاکانی کورد، کەلوپەلێکی زۆر کۆکراوەتەوە و ئەو هەڵمەتە هەروا بەردەوامە.
لە شارەکانی ڕوانسەر، نۆدشە، پاوە، کامیاران، دێولان، قوروە، تیکاب، دیواندەرە، سنە ، مەریوان ، بانە ، بۆکان، سەقز، مەهاباد، سەردەشت، ڕەبەت، نەغەدە وپیرانشار، خەڵکی خۆرسک و خەمخۆر خەریکی کۆکردنەوەی یارمەتی و گەیاندنی کەلوپەلی پێویستن بۆ زیان وەبەرکەوتووانی ناوچەی کرماشان.
ئەم هەڵمەتەو هاتنە مەیدانی خەڵک لە کاتێکدایە کە خەمساردی و خۆ لێبێساحیب کردن بە دامودەزگا دەوڵەتیەکانەوە دیارە و، لەوبارەوە خەڵکی لێقەوماوی سەرپێڵیزەهاو کە زۆرترین خەساریان وەبەرکەوتووە رۆژی رابردوو نارەزایەتییان دەربڕی و هەروەها دەنگ وڕەنگی کۆماری ئیسلامی خەریکی چەواشە کردنی ڕاستییەکان و هێندێک لە ناوەندە ئەمنیەکانیش بەئەنقەست کێشە ساز دەکەن لە سەر ڕێی یارمەتی گەیاندن و دابەشکردنیان بەسەر خەڵکی زیانەمەندی پارێزگای کرماشان.
بە وتەی شایەتحاڵان خزمەتگوزارییەکانی دەوڵەت زۆر لاوازەو ئەوەش کە هەیە هی خەڵک و کەسانی خۆبەخشە.
دوای تێپەڕبوونی سێ رۆژ لەو کارەساتە بەوتەی شایەتحاڵێک هێشتا پتر لە ١٣١ گوند بەکاولاشی ماوەتەوە و تەرمی سەدان کەسی دیکە لەژێر داروپەردووی بینا و خانووەکانن و رێژەی برینداران و کوژراوانیش لە هەڵکشاندایە.
