بەبۆنەی هاتنی جەژنی خاوەنکار، پیرۆزبایی گەرم ئاراستەی هەموو خوشک و برایانی یارسانیمان دەکەین. ئایینی یارسان وەک ئایینێکی مێژوویی و جێی بایەخی نەتەوەکەمان جێگای رێزە و بەداخەوە ناتەبا بوونی ئەم ئایینە لەگەڵ بنەما چەقبەستوەکانی رێژیمی ئیسلامی ئێران وایکردوە رێبازدارانی ئەم ئایینە جارێک بەهۆی ئەوەی کە کوردن لەلایەن دەسەڵاتدارانی ئەم رێژیمەوە بچەوسێندرینەوە و جارێکیش بەهۆی ئەوەیکە رێبازداری ئەم ئایینەن بێڕێزیان پێ بکرێت و لە بچووکترین ماف بێبەش دەکرێن.
کوردستانیانی ئازیز!
لە هەلومەرجێکدا یادی جێژنی خاوەنکار دەکەینەوە کە بەهۆی سەپاندنی هێژموونی ئایینی لەلایەن دیکتاتۆرەکانەوە، کەمایەتییە ئایینیەکان لە مەترسی دان و لەزۆربەی شوینەکان رووبەرووی جینۆساید دەبنەوە و ئەمەش پێشێلکارییەکی ئاشکرای مافی مرۆڤە. لەم قۆناغە هەستیارەدا کە کورد پێیدا تێپەڕ دەبێت، یەکگرتوویی کورد بە هەموو ئایینەکانەوە تاقە رێگای سەرکەوتنمانە. رێژیمی کۆماری ئیسلامی زۆر جار ویستوویەتی لە رێگای دروست کردنی کێشەی ئایینی، داخوازییە نەتەوەییەکانمان بەلاڕێدا ببات. هەر بۆیە پێویستە ئێمەی کورد بە شیعە و سووننە و یارسان و زەردەشتی و مەسیحی و گشت ئایینەکان لەداوی ئەو ململانە ئایینییە نەکەوین کە تەنیا کۆماری ئیسلامی نەفعی لێدەبات و پێویستە دەست لەناو دەستی یەک لە پێناو بەدەستهێنانی مافە نەتەوەییەکانمان لە تێکۆشان بەردەوام بین.
جارێکی دیکەش پیرۆزبایی جێژنی خاوەنکار لە هەموو خوشک و برایانی یارسانیمان دەکەین و رۆژگارێکی خۆشتان بۆ بە ئاواتە خوازین.
یەکیەتی لاوانی دێموکراتی رۆژهەڵاتی کوردستان
کۆمیتەی بەڕێوەبەریی گشتی
٠٤/١١/٢٠١٧