وشكەساڵی و سەرمابردوویی ١٠٠٠ میلیارد تمەنی زەرەر لە جووتیارانی كرماشان داوە

لە ماوەی ئەمساڵدا، وشكەساڵی و بارینی كەم لە لایەك‌و سەرمابردوویی بەروبوومی باخەكانیش لە لایەكی دیكەوە زیاتر لە هەزار میلیارد تمەنیان زەرەر لە جووتیارانی كرماشان داوە.
بەپێی ڕاپۆرتی پەیامنێری كوردستان و كورد، زەرەرو زیانی جووتیاران و خاوەن باغەکانی كرماشان ئاكامی دیاردەی وشكەساڵی‌و سەرمای ناوەختی بەهاری بووە كە زۆربەی ئەوانی تووشی زیان كردوە.
ئەفشین سەفەوی جێگری باشکردنی بەرهەمە گیاییەكانی پارێزگای كرماشان دەڵێ ئێمە مەسەلەی خەسارو زیانی زۆری جووتیارانی كرماشانمان بەگوێی كاربەدەستانی وڵات وەك وەزارەتی جیهادی جووتیاری‌و وەزارەتی نێوخۆ گەیاندووە و داوای یارمەتیمان لێ كردوون تا بەڵكوو ئاسانكارییەك بۆ پێدانی وام بەم جووتیارانە بكرێ‌و ئەوان بتوانن بەشێك لە زیانەكانیان قەرەبوو بكەنەوە.
ناوبراو لە درێژەدا دەڵێ هەرچەند ئێمە داوامان كردووە لە ڕێگەی مادەی ١٠ و ١٢ی ڕووداوە کتوپڕ‌و نەخواراوەكانەوە سەرچاوەی ئەم پارەیە دابین بكرێ، بەڵام دەوڵەت توانای پێدانی ١٠٠٠ میلیارد تمەن قەرەبووی بۆ جووتیارانی كرماشان نییە.
سەفەوی پێداگری كردووە كە جووتیارانی كرماشان دەبێ بەرهەمە جووتیارییەكانی خۆیان بیمە بكەن تا تووشی زیانی لەم چەشنە نەبن‌و لە ڕاستیدا دەوڵەتیش لەو بارودۆخە ئابوورییەی ئێستادا چۆن دەتوانێ بڕی ١٠٠٠ میلیارد تمەن وەك قەرەبوو بۆ جووتیارانی كرماشان دابین بكا؟
لە لایەكی دیكەشەوە حوسێنعەلی كازمی، سەرپەرستی سندووقی بیمەی جووتیاریی پارێزگای كرماشانیش گوتوویەتی كەمتر لە سەدی ١٠ی زەوی‌و زارەكانی پارێزگای كرماشان بیمە كراون وسەدی ٤ی بەرووبوومی باخەكانیش كەوتوونەتە ژێر چەتریی خزمەتگوزاریی بیمەوە.
ناوبراو ڕایگەیاندووە كە ئەم جووتیارانەی بەرهەمەكانی خۆیان بیمە نەكردووە قەرەبووی زیانەكانیان بۆ ناكرێتەوە.