ئەنجومەنی ژینگە پارێزی چیای سەوزی مەریوان لە هەنگی مەرزی بە هۆی ساز کردنی بینایەکی چوار نهۆمی لە قەراخی گۆلی زرێبار شکایەتی کرد.
ئەنجومەنی چیای سەوزی مەریوان بە بڵاوکردنەوەی بەیاننامەیەک و پێشکەش کردنی شکایەتی خۆی لە دژی سازکردنی بینایەک لە قەراخی زرێبار و خەسارگەیاندن بە ژینگە هەڵوێستی گرت.
لە شکایەتنامەکەی ئەنجومەنی چیای سەوزی مەریواندا هاتووە کە بەشێک لە ئورگانە حوکمییەکان و بەتایبەتی هەنگی مەرزی بەبێ سەرنجدان بە هەستیاربوونی ژینگەی ناوچە، بەئەنقەست لە هەوڵی ناوبردنی سروشت وژینگەی کوردستان و بەتایبەتی شاری مەریوانن.
لە تازەترین هەڵسوکەوتی نابەرپرسانەی هەنگی مەرزی و بە کەڵک وەرگرتن لە کەسانی سووک نەفەس و فرۆش وکڕینی جەنگەڵ و دارستانەکانی قەراخی زرێبار دەستیان داوەتە خراپ کردن و لە ناوبردنی ژینگەی ناوچەکە.
ئەنجومەنی چیای سەوزی مەریوان، ژینگەی زرێبار بە مۆڵک و سامانی خەڵکی کوردستان و شاری مەریوان دەزانێ و هەربۆیە لە بەرانبەر سازکردنی بینای چوار نهۆمی و خەسارگەیاندن بە جەنگەڵ و ژینگەی دەوروبەری زرێبار بە توندی هەڵوێستی گرتوەو شکایەتی خۆی لە هەنگی مەرزی ڕادەستە دادگای شاری مەریوان کردووە.
ئەگەرچی ناوەندە ئەمنییەکان هەوڵی کپ کردنی دەنگی ژینگە پاریزانیان دا، بەڵام چالاکانی ژینگە پارێزی مەریوانی بە هاوکاری ژینگەپارێزانی دیکەی کورد بە گەڵاڵە کردنی شکایەتنامەیەک خوازیاری ئەوەن لەڕیگەی یاساییەوە پێش لە خەسارگەیاندن بە ژینگە و سروشتی شوێنی گەشتیاریی زرێبار بگرن کە سامانێکی بەنرخی ژینگەییە لە کوردستان .