فەیلەسووفێکی ناوداری فەرەنسە و جیهانی پێی وایە عێراق دەوڵەت نیە و کۆماری ئیسلامیی ئێران و تورکیەش شکستیان خواردووە.
بێرنارد هێنری لیڤی، بیرمەند و فەیلەسووفی ناوداری فەرەنسە لە چاوپیکەوتنێکیدا لەگەڵ کەناڵی CNN، رایگەیاندووە، گەلی کوردستان لە ریفراندۆمی سەربەخۆییدا دەنگی بۆ دروستکردنی دیموکراسییەتێکی راستەقینە داوە و کوردستانی سەربەخۆ ”دەبێتە دووەم دەوڵەتی دیموکراسیی رۆژهەڵاتی ناوەڕاست“.
ئەو فەیلەسووفە ئاماژەی بەوە کردووە، کە عێراق ”هەر دەوڵەت نیە“ و ئێران و تورکیەش ”دەوڵەتی شکستخواردوو و پەراوێزخراون“، بەجۆرێک، کە ئێران ”هیچ دیموکراسییەکی تێدا نیە“ و تورکیەش بەهۆی سیاسەتەکانی رەجەب تەییب ئەردۆغانی سەرۆک کۆمارەوە ”رۆژ بە رۆژ دیموکراسییەت تێیدا لاواز دەبێ. هەر بۆیە ئەو دوو وڵاتە لە کۆمەڵگەی جیهانی تەریک دەکەونەوە.”
بێرنارد هێنری لیڤی، کە وەک چاودێرێکی نێودەوڵەتی چاودێریی پرۆسەی ریفراندۆمی سەربەخۆیی کوردستانی کردبوو، رایگەیاندووە، ”لە راستیدا ریفراندۆمیکی باش بوو، بە گوێرەی پێوەرە نێودەوڵەتییەکان بەڕێوەچوو و بە دادپەروەرانە دەنگدان کرا”.
ئەو فەیلەسووفە فەرەنسییە بارودۆخی ئێستای کوردستان بە بارودۆخی ئیسرائیل لە ساڵی ١٩٤٨ دەشووبهێنێ، کە بە ”دەوڵەتە دوژمن و پەراوێزخراوەکان“ گەمارو دراوە.
رۆژی دووشەممە ٣ی ڕەزبەر، گەلی کوردستان ریفراندۆمی سەربەخۆیی کوردستانی ئەنجام دا و بەپێی ئاماری کۆمسیۆنی باڵای سەربەخۆیی هەڵبژاردن و ڕاپرسی لە هەرێمی کوردستان، زیاتر لە %٩٢ـی دەنگدەران داوای سەربەخۆیی کوردستانیان کردووە.