ئاکامی ڕاپرسی باشووری کوردستان، بە فەرمی ڕاگەیاندرا

کۆمیسیۆنی باڵای هەڵبژاردن و راپرسی باشووری کوردستان  لە کۆنگرەیەکی رۆژنامەڤانیدا بەفەرمی ئەنجامی بەرایی گشتپرسیی باشووری کوردستانی بۆ سەربەخۆیی راگەیاند

بە پێی هەواڵی ماڵپەڕی ڕووداو، کۆمیسیۆنی باڵای هەڵبژاردن و گشتپرسی ، ئاکامی ئەو هەڵبژاردنەی بۆ ڕای گشتی بڵاو کردەوە و،
بە پێی ئەنجامەکە لە کۆی ئەوانەی مافی دەنگدانیان هەبووە

72.16% ی دەنگدەران بەشدارییان کردووە، 92.73% ی بەشداربووان بە بەڵێ و 7.27% بەشداربووانیش بە نەخێر دەنگیان داوە.

بەپێی ئەنجامەکەی کۆمیسیۆن لەو ژمارەیە 170 هەزار و 611 دەنگ دوورخراونەتەوە، 40 هەزار و 11 دەنگ پووچەڵکراونەتەوە، 9 هەزار و 368 دەنگیش بە سپی دراون.

بەم پێیە 3 ملیۆن و 85 هەزار و 935 دەنگ بە دروستی دراون، لەو ژمارەیە 2 ملیۆن و 861 هەزار و 471 دەنگ بە بەڵێ واتە 92.73% ی بەشداربووان، 224 هەزار و 468 دەنگیش واتە 7.27% ی بەشداربووان بە نەخێر دەنگیان داوە.

لە درێژەی کاردانەوەکان بەرانبەر بە بەڕێوەچوونی گشتپرسی بۆ سەربەخۆیی باشووری کوردستان رۆژی سێشەممە 26-9-2017 حەیدەر عەبادی، سەرۆکوەزیرانی عێراق رایگەیاند، ئەنجوومەنی وەزیران بڕیاریداوە دەروازە وشکانیی و ئاسمانییەکانی هەرێمی کوردستان بخرێنەوە ژێر دەسەڵاتی حکومەتی ناوەندی. بۆ رادەستکردنەوەشیان، سێ رۆژ مۆڵەت دەدەنە کوردستان، مۆڵەتەکە لە کاژێر 6:00ی ئێوارەی رۆژی هەینی 29-9-2017 کۆتایی دێت.
بەڵام بەرپرسانی حکوومەتی هەرێمی کوردستان داواکارییەی حەیدر عەبادییان جێبەجێی نەکردو تا ئێستا وڵاتانی لوبنان و میسر لە سەر داوای حکوومەتی ناوەندی گەشتە ئاسمانییەکانی خۆیانیان  بەرەو هەرێمی کوردستان ڕاگرتووە .
هەر لەو پێوەندیی لە گەڵ بەڕێوەچوونی گشتپرسی  حەیدەر عیبادی بڕیاری داوە کە هێزەکانی دەوڵەتی ناوەندی بەرەو کەرکووک ڕەوانە بکا.