شەپۆلی گیرانو بەند كرانی چالاكانی كورد لە كوردستان هەروا بەردەوامەو هاوكات لەگەڵ ناڕەزایەتییەكانی خەڵكی مەهابادو دوابەدوای ئەویش گرتنی خۆپێشاندەرانو خەڵكی وەزاڵەهاتوو، ٣ چالاكی مەزهەبیش لە دەستبەسەر كراون.
بەپێی ڕاپۆرتی سەرچاوەكانی مافەكانی مرۆڤ لە ئێران، لەماوەی چەند حەوتووی ڕابردوودا ٣ كەسی خەڵكی شاری مەهاباد بە ناوەكانی ئیبراهیم غوڵامعەلی، خوێندكاری ئەندازیاریی پیشەسازییەكان؛ مستەفا خەدیر كرێكار و هێمن كوڕی عەلی بازاڕی، دەستبەسەر كراونو تا ئێستا هیچ زانیارییەك لە بابەت چارەنووسی ئەم كەسانە لەبەر دەستدا نییە.
هەروەها هیچ هەواڵكیش لەسەر بارودۆخی سامان حەریری، هاووڵاتییەكی دیكەی خەڵكی مەهاباد نەزانراوە كە لە كۆتاییەكانی حەوتووی ڕابردوودا، لە لایەن هێزە ئەمنیەتییەكانەوە دەستبەسەر كرابوو.
سامان حەریری، تەمەن ٢٦ ساڵەو دانیشتووی شاری مەهاباد، ڕۆژی پێنجشەممەی حەوتووی ڕابردوو ٢٤ی بانەمەڕ، لە لایەن هێزە ئەمنیەتییەكانەوە دەستبەسەر كراو بۆ شوێنێكی ناڕوون گوازرایەوە. بنەماڵەی سامان بە هۆكاری ناڕوون كە وێدەچێ زیاتر لە ترسی خراپتر بوونی بارودۆخی کوڕەکەیان بێ، خۆیان لە قسە كردن لەسەر گیرانی ناوبراو بواردووە.
