ئەفسانەیان گرت و هەر شەوی یەکەم گڵاویان کرد. نۆ مانگ دواتر لە سللولە تاکەکەسییەکەیدا منداڵەکەی بە مردوویی بوو.
دوو ڕۆژ بوو، مەمکەکانی ئەفسانە هێندەیان شیر تێ هاتبوو، خەریک بوو دەتەقین؛ ناچار ئەفسانە بەدەم پێکەنینێکی فێدارانەوە، مەمکێکی دەرهێنا و لە دەمی منداڵەکەی نا. هەر شیرەکە بەحاڵ لێوی منداڵەکەی تەڕ کرد، وە مڵچەمڵچی خست.
کاتێک ئەفسانە کەف و کوڵی فێیەکەی بڕایەوە و وەخۆ هاتەوە، بینیی منداڵەکەی گوێلک ئاسا خەریکە بە خستی دەیمژێ. ئەفسانە وەک ئەوەی ماری لە کۆشیدا دیتبێ کتووپڕ لە جێی خۆی قیت بۆوە و منداڵەکەی فڕێ دا.
ڕۆژی دواتر، ئەفسانە مەمکەکانی هێندەیان شیر تێ هاتبوویەوە دەتگوت دۆدانەن. ئەفسانە، گوشاری شیری نێو مەمکەکانی لە ئەشکەنجەی جەلادەکانی زیاتر ئازاری دەدا.
ئەفسانە لەبەر ئێشی مەمکەکانی جارێکی دیکەش ناچار بوو پەنا بۆ منداڵەکەی بەرێتەوە. کەلاکی منداڵە نەقوستانەکەی لەبەرپێی هەڵگرتەوە و ئەمجارەیان مەمکەکەی دیکەی خستە زارییەوە. هەرکە گۆی مەمکی لە زاری منداڵە مردووەکەی نا، منداڵەکە بێ وچان دەستی کردەوە بە مەمک مژین. بۆنی منداری منداڵەکەی خەریک بوو کاسی دەکرد. هەرچی دەکرد لووتی پڕ نەدەبوو. بەردەوام بۆنی کەلاکەکەی تازە دەبووەوە.
چاوە بلبۆقەکانی منداڵەکەی وەبیر ئەو جووچکە کۆترە شینکییانەی بەر هەیوانی ماڵی خۆیانی خستەوە کەوا زۆرجار بەرلەوەی چاویان بپشکوێ، دەیبینین بەربوونەتەوە و مردووون. دیارە بۆخۆی قەت بەربوونەوەی جووچکەکانی بە چاوی خۆی نەدیبوو، بۆیە نەیدەزانی کە بە بەربوونەوەیان مردووون، یان ئەو ساتەی کە لە هێلکە جووقاون و دایکەکەیان نەیناسیونەتەوە، فڕێی داونەتە خوارێ و کوشتوونی!؟
منداڵەکە کرم لێیدا بوو و هێشتاش هەر مەمکەکانی ئەفسانەی دەمژی. ئەفسانە دەیتوانی برسێتی و توونێتیی خۆشی بە مەمکەکانیی بشکێنێ، بەڵام دڵی بڕوایی نەدەدا، پێی پیس بوو.
بەرە بەرە منداڵەکە هەڵوەری و تەنیا ئێسکەکانی ما. ئەفسانە بەبەخت بوو، چوونکە ئێسکی کاسە سەری منداڵەکەی لەگەڵ ئەوەی زمان و دەم ولێویشی پێوە نەمابوو هێشتاش هەر دەیتوانی بەجوانی بیمژێ. بەڵام چوونکە منداڵەکە ورگ و گەدەی نەمابوو شیرەکە دەڕژا سەر زەوی و جۆگەلەی دەبەست و دەچووە قاناوی زیندانەوە.
بەڕێوەبەرانی زیندان کە بەم شتەیان زانی هاتن دوو پۆمپیان لە مەمکەکانی ئەفسانە بەست و بە دوو شیلانگ شیرەکەیان بۆ دەرەوەی زیندان ڕاکێشا.
ئەوە چەن ـ دە ـ ساڵێکە خەڵکی ئەو وڵاتە، بە نرخی شیری مەڕ و ماڵات خەریکن شیری لوولەکەشیی مرۆڤ دەخۆن؛ بەواتایەکی دی، خەریکی مژینی شیری ئەفسانەن.
خەڵک دەڵێن: «ئەم شیرە ئەفسانەییە هێسکی وا قایم کردووین، هەر لەخۆڕاوە حەزدەکەین بچینە شەڕی دوژمن، بەڵام بەداخەوە دوژمنێک شک نابەین!»
(لە ژمارەی ٧١٠ ی “کوردستان”دا بڵاو بۆتەوە)
