شەوانی ٢٣ و ٢٤ی خەرمانان لە پارکی شاری دێولان سێیەمین فستیڤاڵی مووسیقای لەیلاخ بە بەشداریی چەندین گرووپی موسیقی کوردی و پێشوازی کردنی بەربڵاوی خەڵک بەڕێوە دەچێ.
سێیەمین فستیڤاڵی مووسیقای لەیلاخ ئەمساڵ کە لە زۆربەی شار و ناوچەکانی رۆژهەڵاتی کوردستان تێدا بەشداربوون، گرووپێکی دیکەش بە سەرپەرەستی ئەییوب عەلی هونەرمەندی باشووری کوردستان لەو فستیڤاڵەدا بەشدارییان کرد.
فستیڤاڵی مووسیقای لەیلاخ بە گرینگیدان بە موزیکی کوردی لە بواری کلاسیک و فۆلکلۆر لە هەوڵی ناسناندن و زیندوو ڕاگرتنی ئاواز و میلوودییە فۆڵک و ڕەسەنەکانە و ببێتە هەوینیک بۆ گەشەی زیاتری مووزیکی کوردی.
لەبەشێک لە کارەکانی ئەو فستیڤاڵەڕێز لە ماندووبوونی ئەو هونەرمەندانە دەگیردرێ کە تەمەنێکیان بۆ گەشەی گۆرانی کوردی تەرخان کردووە.
ساڵی ڕابردوو یەکێک لە فۆلکلۆربێژانی ئەو ناوچەیە بەناوی حەبیب ملەیی تەندیسی رێزلێنانی پێشکەش کرا.
حەبیب ملەیی پتر لە ٤٠ساڵە بە چڕین و گوتنەوەی مەقام و ئاوازە فۆلکلۆریکەکانی ناوچەی لەیلاخ و سنە، بەشێکی زۆری لە ئاواز و مەقامە کۆنەکانی ڕادەستی نەوەی نوێ کردووە.
ئەمساڵیش چەند کەس لە فۆلکلۆربێژان و ژەنیارانی کورد لەو فستیڤاڵەدا خەڵات دەکرێن.
سێیەمین ڤستیڤاڵی مووسیقای لەیلاخ بە ئامادەبوونی دەیان کەسایەتی هونەری و کۆمەڵایەتی کوردستانی و بەشداریی بەرفەراوانی خەڵک بۆ ماوەی دوو شەو درێژەی دەبێ.
شایانی باسە ئەو فستیڤاڵە بەهەوڵ وماندوویی چالاکانی مەدەنی و هەروەها پاڵپشتی شوڕای شاروگوندەکان و هونەرمەندانی ناوچە، ماوەی سێساڵە لە شاری دێولان بەڕێوەدەچێ.