وەرزشگای ١٥ هەزار كەسیی شاری ئیلام پاش ٩ ساڵ، تا ئێستاش تەواو نەکراوەو ڕاپۆرتەكان باس لەوە دەكەن ئەم وەرزشگایە هەر لە بنەڕەتدا بە نەزۆکی لە دایک بووەو كەسیش وەڵامدەری تێچووە میلیاردییەكانی ئەم یاریگایە نییە.
بەپێی ڕاپۆرتی هەواڵدەریی مێهر، هەموو ساڵێك بەڵێنیی تەواوكرانی پرۆژەی ئەم یاریگایە بە خەڵكی ئیلام دەدرێ، یاریگایەک كە بڕیار بوو دادپەروەری بۆ وەرزشی ئەم پارێزگایە دابین بكا، بەڵام نەتەنیا ئەم بەڵێنە وەدی نەهاتووە، بەڵكوو بە خەرجكردنی تێچووە میلیاردییەكان بۆ دروست كردنی ئەم یاریگایە، كارناسانی بواری ئاوەدانكردنەوە دەڵێن لە حاڵی حازردا ئەو یاریگایە ئەگەر تەواوو دەسبەکاریش بێ، هێشتا لە ڕووی ئابوورییەوە بە قازانج نییە، چونکی خەریکە دەپڕووکێ.
هەر بەپێی ئەم ڕاپۆرتە لە ئێستادا دروستکردنی پرۆژەی وەرزشگای ١٥ هەزار كەسیی شاری ئیلام گەیشتۆتە دوایین قۆناغەكانی خۆی، بەڵام هیچ باسێك لە پەلە کردن بۆ تەواوکردنی ئەم پرۆژەیە نییە.
عەلی نووری یەكێك لە وەرزشكارانی پارێزگای ئیلام دەڵێ كەسانێك بڕیار لەسەر وەرزشی ئەم پارێزگایە دەدەن كە هیچ بەرنامەیەكی ڕوون و دیاریكراویان بۆ پەرەپێدانی وەرزش لە ئیلام نییە و كاربەدەستانی وەرزشی پارێزگاش هەموو جارێ نەبوونی بودجەو ئیعتیبار بە هۆكارو بیانوی تەواو نەبوونی ئەم پرۆژەیە دێننەوە.
