مەحموود نەبەویان یەکێک لە مەرجەعەکانی ئاینی ئێرانی ڕۆژی ڕابردوو داوای كوشتنی ئەو كەسانەی كرد كە لە ئێراندا باوەڕیان بە دەسەڵاتی فراوانی ویلایەتی خامنەیی نیە و داوای كرد گۆشت و ئێسكی ئەوانە بخورێ.
مەحموود نەبەویان لە کۆبوونەوەیەکی رۆژنامەوانی بە هەواڵدەریی (فارس)ی ئێرانی نزیك لە ئیتلاعات بە ئاشكرا گوتوویەتی هەر كەسێك باوەڕی بە دەسەڵاتی ڕەهای ویلایەتی فەقیهی ئێران نەبێ، پێویستە بكوژرێ، گۆشت و ئێسكەكەشی بخۆرێ.
هەروەها نەبەویان گوتوویەتی، “ئاینی ئیسلام بنەماكانی خواردنی گۆشتی ئەو مرۆڤانەی ڕوون كردووەتەوە، كە باوەڕیان بە ویلایەتی فەقیه نیە. هەروەها ئاماژەی بەوە داوە كە خواردنی گۆشت و ئێسكی ئەو مرۆڤانەی باوەڕیان بە ویلایەتی فەقیه نیە لە حەفتا ساڵ عیبادەت باشترە.”
مەرجەعە ئاینیەكەی کۆماری ئیسلامیی ئێران هیچ دەقێكی ئاینی نەهێناوەتەوە بۆ پشتیوانیكردنی فەتواكەی لەبارەی عەلی خامنەیی ڕێبەری کۆماری ئیسلامیی ئێرانەوە، تەنها ئاماژەی بەوە داوە كە پێش چەند رۆژێك داوای لە دادگای ئێرانی كردووە حوكمی لەسێدارەدان بەسەر ئەوانەدا بسەپێندرێ كە باوەڕیان بە دەسەڵاتی رەهای خامنەیی نیە.
