بەهمەن قوبادی وەکو دادوەری بەشی پێشبڕکێی سەرەکی بیست و دووەمین فیستیڤاڵی نێودەوڵەتی فیلمی بووسان لە کۆرەی باشوور بانگ کرا.
بەهمەن قوبادی، سینەماکاری ناوداری کورد بە هاوڕێیەتی لەگەڵ “ئۆلیڤێر ئستۆن” دەرهێنەر ناوداری سینەما لە وڵاتی ئامریکا، “ئێگنێس گۆدار” بەڕێوەبەریی وێنەگرتن لە وڵاتی فەڕانسە، “لاو دیاز” دەرهێنەر لە وڵاتی فیلیپیین و هەروەها “جان سوون ـ ڤو” دەرهێنەر لە وڵاتی کۆرەی باشوور ئەندامانی دادوەری بەشی پێشبڕکێی سەرەکی بیست و دووهەمین خولی فیستیڤاڵی نێودەوڵەتی فیلمی بووسان لە وڵاتی کۆرەی باشووریان لە ئەستۆ دایە.
ژمارەیەکی زۆر لە فیلمسازان و ئەکتەرانی ناودار لە سەرتاسەری جیهان هەموو ساڵێک بەشداریی لە فیستیڤاڵی نێودەوڵەتی فیلمی بووسان دەکەن و هەروەها لە ڕوخسارە بەناوبانگەکانی سینەمای جیهانیش بۆ لێژنەی دادوەرانی ئەم فیستیڤاڵە بانگهێشت دەکرێن.
لە بیست و دووەمین خولی فیستیڤاڵی نێودەوڵەتی فیلمی بووسان، لە بەهمەن قوبادی سینەماکاری ناوداری ڕۆژهەڵاتی کوردستان کە بەم دواییانە وەکو 25 دەرهێنەری بەرچاویی سەدەی بیست و یەکەمی جیهان دیاریکراوە، بۆ ئەندامی لێژنەی دادوەرانی ئەم فیستیڤاڵە بانگهێشت کراوە.
فیستیڤاڵی نێودەوڵەتی فیلمی بووسان کە لە شاری بەندەری بووسان لە کۆرەی باشوور بەڕێوەدەچێ، وەکوو گرینگترین فیستیڤاڵی فیلمی ئاسیا ناسراوە و هەموو ساڵێک بە نمایشی بەرهەمی فیلمسازانی وڵاتانی جۆراوجۆری جیهان بەڕێوەدەچێ.