ماڵپەڕی فاكس نیوزی ئەمریكی لە بابەتێكدا بڵاوی كردەوە كە پێویستە ئامریكا پشتیوانی لە سەربەخۆیی كوردستان بكا، چونكە بەرژەوەندی لەگەڵ كوردەكانە.
فاكس نیوز بابەتێكی لە ژێر ناونیشانی “پێویستە ترامپ پشتیوانی سەربەخۆیی كوردستان و ڕێگری لە گەیشتنی ئێران بە دەریای ناوەڕاست بكا”، بڵاوی كردووەتەوە و تێیدا كە لە ٣ن ڕەزبەری ئەمساڵ هەرێمی كوردستان ڕیفراندۆم بۆ سەربەخۆیی و جیابوونەوە لە بەغدا دەكا، ئەوە هەنگاو و دەرفەتێكی باشە و لە بەرژەوەندی ئامریكا دایە.
نووسەری بابەتەكە بۆ فاكس نیوزی نووسیوە “پێویستە دۆناڵد ترامپ پشتیوانی لە خواست و ویستی كوردستان بكا بۆ گەیشتن بە سەربەخۆیی، ئەو هەنگاوەی ئەوان ماوەیەكی زۆر چاوەڕێی دەكەن و دەرمانی ستەمی مێژووە كە لە ڕێی ڕێكەوتنی سایكس- پیكۆوە لێیان كراوە، چونكە لەو كاتەدا ناوچەكە لەسەر بنەمای جوغرافی نەتەوەیی و ئاینی دابەش نەكراوەتەوە، بەڵكو بە جۆرێك دابەش كرایەوە تا وڵاتان بتوانن بەسەر سامانە سروشتییەكانی زاڵ بن، هاوكات دەرفەتێكیشە بۆ ئەوەی کە عێراق سیاسەتی چەسپاندنی ئاسایش بگرێتەبەر”.
لە بەشێكی دیکەی وتارەكەدا ئاماژە بۆ ئەوە دەكا كە كوردەكان گەورەترین نەتەوەی بێ دەوڵەتن لەسەر زەوی، لە ناوچەیەك دەژین كە زۆرینەی دانیشتووانی كوردە و شوێنێكی جوغرافیایی دیاریكراویان هەیە و بە زۆر بەسەر توركیە و عێراق و سووریە و ئێران دابەش كراون، بەو شێوەیە بوونەتە كەمایەتی لەو وڵاتانە و ڕووبەڕووی لەناوچوون بوونەتەوە.
هەروەها نووسەری ئەو بابەتە دووپاتی كردەوە پێویستە ئامریكا هاوپەیمانییەتیەك دروست بكا كە كوردستانی سەربەخۆ و عێراق و ناتۆ لەخۆ بگرێ و بەیەكەوە ئارامی بۆ ناوچەكە بگەڕێننەوە، لە كۆتاییدا ئاماژە بەوە دەكا كە پێویستە ڕێكەوتنێكی درێژخایەن بۆ پاراستنی دۆستەكانمان لە ناوچەكە لەگەڵ كوردەكان بكەین.
