بەردەوامیی خۆپیشاندانەکانی پشتیوانی لە مەهاباد لە وڵاتی دانمارک

کوردانی وڵاتی دانمارک بۆ پشتیوانی لە ناڕەزایەتییەکانی خەڵکی مەهاباد‌و ڕۆژهەڵاتی کوردستان بە ڕووداوەکەی هۆتێل تارا بەشداریی چەند رێپێوان‌و خۆپیشاندانیان کردوە.
لە سەر بانگەوازی هاوبەشی حیزبی دیمۆکراتی کوردستان‌و کۆمەڵەی زەحمەتکیشانی کوردستان لە وڵاتی دانمارک ڕۆژی هەینی 25 ی بانەمەڕ کۆبوونەوەیەکی نارەزایەتی دەربڕین بە ڕەفتارو سیاسەتەکانی کۆماری ئیسلامی بە بەشداریی کۆمەڵێکی بەرچاوی کوردستانیانی نیشتەجێی ئەو وڵاتە لە بەر دەرکی باڵوێزخانەی کۆماری ئیسلامی ئیران لە کۆپینهاگ بەڕێوەچوو.
لەو خۆپیشاندانەدا جارێکی دیکە کوردانی تاراوگە یەکگرتووانە پشتیوانیی خۆیان لە راپەرینی رۆژهەڵاتی کوردستان دەربڕی‌و دەیان درووشمی جۆراوجۆر، دژی کۆماری ئیسلامی ئیران بە زمانەکانی کوردی، فارسی ، دانمارکی و ئینگلیسی گوترانەوە.
هەر لە دریژەی خۆپیشاندانەکەدا بەیاننامەیەک بە ناوی رەوەندی کوردی دانیشتووی وڵاتی دانمارک بە دژی کۆماری دژی گەلی ئیسلامی ئیران‌و بە پشتیوانی فەرینازی بیتاوان‌و سەرهەڵدان و بەرخودانی مەهاباد‌و سەردەشت و باقی شارەکانی رۆژهەڵاتی کوردستان بە زمانەکانی کوردی وفارسی و دانمارکی خویندرایەوە.