دەوڵەتی ئاڵمان پشتیوانی لە شه‌ڕو به‌ربه‌ره‌کانیی هێزی پێشمەرگە لە دژی داعش لە باشووری كوردستان دەكا. ڕاگەیەنەكانی ئاڵمان ده‌ڵێن كە دەوڵەتی ئەم وڵاتە تا ئێستا نزیكەی ٦٠ میلیۆن یورۆی وەك یارمەتیی نیزامی بۆ هێزی پێشمەرگە لە باشووری كوردستان ناردووە.
وەزارەتی بەرگریی ئاڵمان ده‌ڵێ كە ئەم وەزارەتخانەیە بۆ ڕووبەڕوو بوونەوە لەگەڵ داعش، پشتیوانی لە هێزی پێشمەرگە دەكا.
ڕۆژنامەی “ویرتشافتز ڤوخە” نووسیویەتی تا ئێستا نزیكەی ٦٠ میلیۆن یورۆ لە چوارچێوەی یارمەتییە نیزامییەكانی ئاڵمان بۆ هێزی پێشمەرگەی كوردستان نێردراوە كە بریتییە لە چەك و چۆڵ، تەقەمەنی‌و كەرستەی نیزامی. دەوڵەتی ئاڵمان هەروەها نزیكەی ٤٥ میلیۆن یورۆی دیكەشی وەك یارمەتیی مرۆڤدۆستانە خستۆتە بەر دەستی هێزی پێشمەرگەوەو نزیكەی ١٣٨ تۆن تەقەمەنیشی بۆ هەرێمی كوردستان ناردووە.
ناردنی ئەم یارمەتییانە بۆ كوردستان لە حاڵێك دایە كە ئەرتەشی ئاڵمان ئەركی ڕاهێنانی نیزامیی هێزی پێشمەرگەی باشووری كوردستانیشی وە ئەستۆ گرتووە.
دووهەمین خولی ڕاهێنانی هێزی پێشمەرگەی كوردستان لە باشوور لە لایەن كارناسانی ئاڵمانییەوە لە مانگی بانەمەڕی ئەمساڵ کۆتایی پێهات‌و هەروەها وڵاتانی ئامریكا، بریتانیا، ئیتالیا، نۆروێژ و هولەندیش به ڕاهێنانی نیزامیی هێزی پێشمەرگەی كوردستانه‌وه ماندوون.
شایانی باسە ناردنی دوو باری نوێی ئەرتەشی ئاڵمان بۆ هێزی پێشمەرگە لە حاڵێك دایە كە مەسعوود بارزانی، سەرۆكی هەرێمی كوردستان ڕۆژی شەممە ١٩ی بانەمەڕ ڕایگەیاند ئامریكا گەرەنتی ئه‌وەی كردووە كەڕاسته‌وخۆ چەك‌و چۆڵ بە هێزی پێشمەرگەی كوردستان بده‌ن.
