ڕۆژنامەی Turun sanomat کە ڕێژەی خوێنەرانی ٢٠٥٠٠٠ ھەزارکەسە و لە شاری Turku ی وڵاتی فینلەند بڵاو دەکرێتەوە، لە ڕێکەوتی ۲۱- ٨-۲۰۱۷ چاوپێکەوتنێکی لەگەڵ بەڕێز سکرتێری گشتی حیزبی دێموکراتی کوردستان، مستەفا مەولودی پێکھێنا کە لە ژمارەی ڕۆژی ۲۳-٨-۲۰۱۷ بڵاوی کرایەوە.
وتوێژی رۆژنامەی ناوبراو لە گەڵ سکرتێری حیزبدا لە ژێر سەردێری “ئەو ئازارەی ئێستا فینلەندییەکان تەجروبەی دەکەن بۆ ئێمە ئاشنایە”، بڵاوکراوەتەوە.
ڕۆژنامەی توروون سانۆمات بەم پێشەکییەوە وتوێژەکەی چاپ کردوە: “بەڕێز مستەفا مەولودی بە دانانی تاجەگوڵینە لە شوێنی ڕوودواە تیڕۆریستییەکەی شاری تورکوو، ھاوخەمیی حیزبی دێموکرات و خەڵکی ڕۆژهەڵاتی کوردستانی بە فینلەندییەکان ڕاگەیاند.
کورد وەک نەتەوەیەک بە حەشیمەتێکی پتر لە ٣٠میلیۆن کەسی بێ دەوڵەتن و بەسەر وڵاتانی ئێران و عێڕاق و تورکیە و سوریەدا بەش کراون. حیزبی دێموکڕاتی کوردستان(ئێران) لە ساڵی ١٩٤٥ی هەتاوی پێکھات و یەکەم کۆماری کوردستانی دامەزراند. کاتێک یەکیەتیی سۆڤییەت ئەو ناوچەیەی بەجێ ھێشت، حکومەتی ئەو کاتی ئێران ھێرشی کردە سەر کۆماری کوردستان و سەرۆک کۆمار، قازی محەمەدی شەھید کرد و کوردستانی داگیر کردەوە. بەدوای شۆڕشی ئێران دا ئایەتوڵڵا خومەینی فەرمانی جەھادی بۆسە ر کوردستان دەرکرد و تا ئێستا کۆماری ئیسلامی ئێران پتر لە ١٠ھەزار کوردی کوشتووە. لە ساڵی ١٩٨٨ سکرتێری ئەو کاتی حیزب، د. قاسملووی لە سەر میزی وتو وێژ لەوڵاتی ئوتڕیش و ساڵی ١٩٩٢ د.شەڕەفکەندی، سکرتێری ئەو کاتی حیزب لە وڵاتی ئاڵمان بە دەستی تێرۆریستانی ئێران تێڕۆر کراون و پتر لە سەدان ئەندامی حدک و حیزبەکانیتریش لە کوردستانی عێڕاق، بە فەرمانی کاربەدەستانی ئەو حکومەتە تێرۆر کراون. ئەو حیزبە ساڵی ٢٠٠٦ بوو بە دوو حیزب واتە (حدکا) بە سکرتێریی مستەفا ھیجری و، (حدک) کە مستەفا مەولودی (لە سەری ساڵی ئەو ساڵەوە بۆتە سکرتێری). مستەفا مەولودی وەک سکرتێری حیزبێکی بەھێزی کوردستانی ئێران ئێستا لە ئوڕوپایە و سەردانی کاربەدەستانی وڵاتان و هەروەها ئەندامانی حیزبەکەی دەکا. بە ھەڵکەوت ڕۆژی ھەینی، واتە ئەو ڕۆژەی کە تێڕۆر بۆ یەکەم جار لە فینلەند ڕوویدا گەیشتە شاری تورکوو. ئێمە ئەو ھەلەمان بە دەرفەت زانی و ئەو وتووێژەمان لەگەڵ پێک هێناوە .
سەرەتا بەڕێز مەولوودی بەم سێوەیە بۆ رۆژنامەکەمان دوا:
“ئێمە وەک حدک و وەک نەتەوەی کورد بۆخۆمان قوربانی تێڕۆریزمین و ھەست بە ئێش و ئازاری فینلەندییەکان دەکەین و ھەر لە ڕۆژنامەکەی ئێوە ڕا بە خەڵکی فینلەند دەڵێێن کە ھاوخەمتانین و بە توندی وەک ھەمیشە و لە ھەر شوێنێک کردەوەی تێڕوریستی مەحکوم دەکەین. زۆر بە داخین وڵاتێکی پێشکەوتوو و دێموکڕاتی وەک فینلەند کە پەنای داوە بە خەڵکانێکی زۆر، ڕۆژی هەینی دەستی ڕەشێ تێرۆری گەیشتێ و بووە ئامانجی تێرۆریستان.”
لە وەڵامی ئەو پرسیارەی دا کە فینلەند کوردی لێ دەژی وئێوە نیگەران نین کە بەدوای ئەو کردەوە تێڕۆریستییەدا ئەمنییەتی کوردەکان لە مەترسی بکەوێ، مەولودی گوتی: نیگەرانییەکە بچووکە. یەکەم بەڕێوەبەران و کاربەدەستانی فینلەند وشیارن و دووھەم ھەموو جیھان دەزانی کورد لە سەفی یەکەم دا و بەکردەوە شەڕی تێڕوڕ و داعیش دەکا. حدک وەک حیزبێکی سێکۆلار و دێموکڕات لە ئەساسنامەکەشی دا ئیشارەی پێداوە کە سیاسەت لە دین دەبێ جیا بێ و حیزبی ئێمە پشتیوانی لە هۆشیاری کۆمەڵایەتی و فێر بوون و فێرکاری و مافی مرۆڤ دەکا و ھیوادارین کوردکان بە خویندن و کردەوەی باش و خۆ گونجاندن لەگەڵ کۆمەڵگای ئێوە وەک ھەمیشە مروڤ گەلێکی بەکەڵک بن.
لە وەڵامی ئەو پرسەشدا کە ئەو کەسەی ئەو تێڕۆڕەی کردووە جارێک وەڵامی ڕەدی پێدراوە و ئێوە پێتان باشە ھەر کەس وەڵامی ڕەدی وەرگرتەوە بگەڕێندرێتەوە وڵاتی خۆی، مەولودی گوتی: نەخێر پێم باش نییە و پێویستە مەجال بدرێ تا پەناخواز پەروەندەکەی تەکمیل بکا و کاربەدەستانی وڵات کە ئەرکی پاراستنی گیانی ھاووڵاتی خۆیان لەسەر شانە پێویستە ئەو کەسانەی وەڵامی ڕەدیان ھەیە و جێگای نیگەرانین حەد و مەرزێکیان بۆ دابنێن. وڵاتانی ئوڕوپایی ئەگەر دەیانھەوێ پێش بە ھاتنی پەنابەر بگرن باشترە لە سەقامگیر کردنی دێموکڕاسی و مافی ژیان و مافی مروڤ دا بەتایبەت لە ڕۆژھەڵاتی نێوەڕاستدا ھەوڵی جیددی تر بدەن و نەتەوەی کورد وەک نەتەوەیەکی بێ دەوڵەت پشتیوانی ئێوەی پێویستە. بۆ وێنە ٢٥ی مانگی ٩ لە کوردستانی عێڕاق ڕێفڕاندۆم بەڕێوە دەچێ و ئێوە پێویستە ھاوکاریان بکەن و پشتیان بگرن. بە باوەڕی مەولودی داعیش ھەوڵی دا ڕۆژھەڵاتی ناوەڕاست بەرەو تووندڕەوی ببات و شکستی خوارد و لە ئوڕووپا داعیش خۆی لە نێوان موسوڵمانەکان ومەسیحی و ئوڕووپاییەکاندا دەبینێ و بە کردەوەی وەک ڕووداوی ڕۆژی ھەینی تورکوو و کوشتنی مرۆڤە بێ تاوانەکان دەیھەوێ ترس بخاتە ناو کۆمەڵگا تا خەڵکی ئەو وڵاتە فشار بۆ سەر پەنابەران و موسوڵمانان زیاد بکەن.
لەکۆتایی دا بەڕێز مستەفا مەولودی پیرۆزبایی حیزبی دێموکراتی کوردستانی بە بۆنەی سەت ساڵەی سەربەخۆیی وڵاتی فینلەند بە ھەموو فینلەندییەک ڕاگەیاند.
