بە پێی هەواڵێک کە لە شاری سەردەشت بە دەستمان گەیشتوە، شەوی ڕابردوو هێزەچەکدارەکانی رێژیم هێرش دەکەنە سەر کۆڵبەران و زیاتر لە ٢٠ کەسیان دەسبەسەردەکەن و دەستیان بەسەر کەلوپەلی کۆڵبەران داگرتووە.
هەروەها هەواڵدەریی موکریان شووناسی کۆڵبەرێکی کوژراوی لە ناوچەی سەلاس بڵاو کردەوە.
رۆژی دووشەممە ١٦ی گەلاوێژ لە دەوروبەری ئاوایی تازاوای سەلاسی باوەجانی لە پارێزگای کرماشان بە هۆی تەقەی ڕاستەوخۆی هێزە چەکدارەکان کاسبکارێکی کورد بەناوی محەممەد باهر قەیتولیزادە” خەڵکی گوندی بەندرە گیانی لەدەست دا.
ئەمە لە کاتێکدایە کە لە رۆژانی رابردوو دوو کەسبکاری دیکەی کوردلە ناوچەی بانەو پیرانشار لە لایەن هێزە چەکدارەکانی رێژیمەوە کوژراون.
لە پێوەندی لە گەڵ کارەساتی کۆڵبەر کوشتن و تاڵان کردنی کەلوپەلی کاسبکارانی کورد کە تەنیا سەرمایەی بژیوی ژیانیانە نوێنەری خەڵکی هەورامان لە مەجلیسی شوڕای ئیسلامی لەو بارەوە بە توندی ڕەخنەی گرت.
شەهاب نادری بە باسکردن لە دۆخی کۆڵبەران لە سەرسنوورەکانی هەورامان گوتی: لە سنوورەکانی هەورامان کەس بەرپرسیار نیەو هێزە چەکدارەکان بەبێ ئەوەی پرسیاربکەن یان ئیزن وەرگرن بە ئاسانی تەقە لە کاسبکارانی کورد دەکەن و رۆژ نیە هەواڵی کوژران و بریندار بوونی کاسبکارێک بڵانەبێتەوە.
شەهاب نادری وێڕای دەربڕینی هاوخەمیی لە گەڵ بنەماڵەیەک کە چەندرۆژ لەمەوبەر کوڕێکی ١٥ساڵەیان بە تەقەی هێزەکانی سەر سنوور گیانی لە دەست دا، گوتی: هیندێک لە ناوەندەکان و بەرپرسان لەو بارەوە خەمساردو کەمتەرخەمن و زۆرجار بە بێ موڵەتی یاسایی کۆڵبەران کەوتونەتە بەر دەستدرێژ گوللەو کوژراون.