سەرۆکی کۆمسیۆنی باڵای سەربەخۆی هەڵبژاردن و راپرسی لە هەرێمی کوردستان ئاشکرای کرد، لە کۆتایی ئەم مانگەوە، تیمێکی ئامریکا لە ئاستی باڵا بۆ پرسی چاودێریکردنی ریفراندۆم بۆ سەربەخۆیی کوردستان، کە وا بڕیارە لە ڕۆژی ٣ی ڕزبەر ئەنجام بدرێ، دەگاتە کوردستان.
ئەو تیمە لە بواری پڕۆسەی هەڵبژاردن و رێکخراوە دیموکراسییەکاندا کار دەکەن، هەروەها چاودێریی پڕۆسەی ریفراندۆم و هەڵبژاردن و رێکارەکانی پڕۆسەکە دەکەن، هەر بۆیەش ماوەیەک پێش پڕۆسەکە دێنە کوردستان“.
بەرپرسیەکی کۆمیسیۆنی هەڵبژاردن ئاماژەی بەوەش دا، ئەو تیمە باوەڕپێکراوی جیهانییە و لە زۆر وڵاتدا چاودێریی پڕۆسەی ریفراندۆم و هەڵبژاردنیان کردووە، هەروەها گوتیشی: ”دوای پڕۆسەی ریفراندۆم و هەڵبژاردن، ئەو تیمە راپۆرتی خۆی لەسەر چۆنیەتیی ئەنجامدانی پڕۆسەکە بڵا دەکاتەوە، کە راپۆرتەکانیان قورسایی نێودەوڵەتییان هەیە، ئەگەر بێتو بە شێوەیەکی ئەرێنی باس لە چۆنیەتیی ئەنجامدانی پڕۆسەکە بکەن، ئەوا راپۆرتەکانیان کاریگەرییان دەبێ بۆ دانپێدانانی نێودەوڵەتی بە ئەنجامدانی پرۆسەکە، چونکە ئەو تیمە بڕواپێکراوی جیهانین، کە لەو بوارەدا کار دەکەن و پێشتر هەڵسەنگاندن بۆ کارەکانیان کراوە“.
پڕۆسەی ریفراندۆم لە هەرێمی کوردستان بە پێوەری نێودەوڵەتی بەڕێوە دەچێ و پێشبینیی ئەوە دەکرێ کە تیمی وڵاتانی دیکەش بەشداریی ئەو پڕۆسەیە بکەن.