بە پێی هەواڵی گەیشتوو لە شاری سەردەشتەوە، ئێوارەی رۆژی دووشەممە ڕێکەوتی ٢ی گەلاوێژ ،ڕووداوی هاتوچۆ و پێکدادانی ماشین لە ناوچەی سەردەشت و لە جادەی سەردەشت بۆ نەڵاس ٥ کەس بریندارو کوژراوی لێکەوتەوە.
دوو کەس لە وانە بەناوەکانی ئەحمەد کاکەیی و کەماڵ کاکەیی باوک و برای یەکێک لە شەهیدانی سەربەرزی حیزبی دیموکرات کە دەستبەجێ گیانیان لەدەست داوە.
ئەحمەد کاکەیی تەمەن ٦٥ ساڵە باوكی شەهید حسێن کاکەیی و کەماڵ کاکەیی براگەورەی شەهیدی ناوبراو کە لەو ڕووداوەدا گیانیان لە دەست داوە، خاوەنی بنەماڵەیەکی تێکۆشەر و خەمخۆری گەل و حیزبن.
شایانی باسە شەهید حسین کاکەیی ساڵی ٦٢ی هەتاوی بوو بە پێشمەرگەو دووساڵ دواتر لە کاتی گرتنی مۆڵگەیەکی سپای پاسداران لە گوندی زیویە شەهید کرا.
بەم بۆنەوە ڕاگەیاندنی حیزبی دێموکراتی کوردستان وێڕای پێشکەش کردنی پرسەو سەرەخۆشی لە بنەماڵەی کاکەیی خۆی بە شەریک وبەشدار لە خەمیان دەزانێ و هەروەها بۆ برینداربووانی دیکەش هیوای سڵامەتی وچاکبوونەوە بە ئاوات دەخوازێ.
