کوردانی دانیشتووی دەرەوەی وڵات لە وەڵام بە بانگەوازی خەڵکی مەهابادو حیزب و ڕێکخراوە سیاسییەکانیان لە خۆپیشاندانەکانیان بۆ پشتگیری لە خەڵکی مەهاباد بەردەوامن.
ڕۆژی هەینی، ١٨ ی بانەمەڕ کۆمەڵێک لە کوردانی نیشتەجێ لە شاری یۆتێبۆریی وڵاتی سۆئێد، لە ” بۆرنێس پارک” کۆبوونەوەو بە دانی درووشمی جۆراوجۆرو دەربڕینی دەنگی نارەزایەتی، بیزاریی خۆیان بەرامبەر بە سیاسەتە دژی مرۆڤایەتییەکانی ڕێژیمی ئیسلامیی ئێران دەربڕی‌و پشتیوانی خۆیان لە خەڵکی ئازاو چاونەترسی شاری مەهاباد ڕاگەیاند.
لەو خۆپیشاندانە بە بەرز کردنەوەی ئاڵای کوردستان‌و چەندین درووشمی جیاواز، داوایان لە کۆڕ و کۆمەلە نیودەوڵەتییەکان‌و حکومەتی سۆئێد کرد کە چی دیکە لە بەرامبەر سیاسەتی ئینکارو قڕکردن‌و پڕ لە سووکایەتیی کۆماری ئیسلامی دەرحەق بە گەلی کورد بیدەنگ نەبن و نارەزایەتیی توندی خۆیان دەرحەق بەو ڕووداوە ناشایسستانەی کاربەدەستانی ڕژیمی ئیسلامی نیشان بدەن.
شایانی باسە کومیتەی حیزبی دیموکراتی کوردستان لە شاری یۆتێبۆری لەو خۆپیشاندانەدا بەشدار بوون‌و دەنگی خۆیان خستە پاڵ دەنگی هەموو ئازادی خوازانی کوردو نەیارانی سیاسەتی ئینکار و کوشت و بڕی ڕژیمی ئیسلامی ئێران.
