رۆژی یەکشەممە ڕێکەوتی ١٨ی پووشپەڕ دووکەس لە ژنانی نێو ریزەکانی حیزبی دێموکراتی کوردستان سوهەیلا قادری سکرتێری یەکیەتیی ژنانی دێموکراتی کوردستان و نەسرین حەداد ئەندامی کۆمیتەی ناوەندی حدک لە یەکەمین کۆبوونەوەی ئامادەکاری بۆ سێیەمین کۆنفڕانسی ژنانی چوارپارچەی کوردستان لە سلێمانی بەشدارییان کرد.
لەو کۆبوونەوە کە بۆ ئامادە کاری بۆ بەستنی سێیەمین کۆنفرانسی نەتەوەیی ژنانی کورد پێکهاتبوو، لە سەر پرس و دۆخی ژنان لە نێوان نوێنەرانی ژن لە پارتە سیاسییەکان و نوێنەری ڕێکخراوی ژنانی هەر چوار پارچەی کوردستان گفتوگۆ کرا.
ژنانی چالاک و بەشداربوو لەو کۆبوونەوە بە هەڵسەنگاندنی هەلومەرجی ژنان لە رۆژهەڵاتی ناوەڕاست دۆخی ژنی کوردییان لە هەرچوار بەشی کوردستان خستە بەر باس و سوهەیلا قادری به نوێنهرایهتی ناوهندی ڕێکخراوهکانی ژنانی رۆژههڵاتی کوردستان پەیامێکی پێشکهش بهو کۆبوونهوه کرد.
لە بەشێك لە پەیامی ناوهندی ڕێکخراوهکانی ژنانی رۆژههڵاتی کوردستان بە ئاوردانەوەیەک لە مێژووی گرفت و کێشەکانی ژنانی کورد و بە خستنەڕووی دۆخی ژنانی رۆژهەڵاتی کوردستان هاتووه؛
هەروەك چۆن پرسی كورد لە هەر بەشێك خاوەن تایبەتمەندی و جیاوازی خۆیەتی، پرسی ژنیش سەرەرای ئەوەیكە خاڵە هاوبەشەكانیان زۆرە بەڵام ئەم تایبەتمەندی و جیاوازیەش ئەوانی گرتووەتەوە. ژنی كورد لە رۆژهەڵاتی كوردستان خاوەن مێژوویەكی دوور و درێژ و لە هەمان كاتیشدا پڕ هەوراز و نشێوە. لە سەردەمی كۆماری كوردستان و هاتنە مەیدانی ژنان لە بواری كۆمەڵایەتی و پەرەدان بە خوێندن و ئاستی رۆشنبیری ئەوان یەكێك لە هەنگاوە گرنگەكانە بۆ گۆرانكاریی لە دۆخی ژناندا. لە راپەرینی گەلانی ئێران لە دژی رژیمی شا و زاڵبوونی فەزا و دۆخی شۆرشگێرانە لە هەموو پانتایی كوردستان، ژنی كوردیش وەك هەر تاكێكی دیكە هاتە مەیدان و لەم بوارەدا گەلێك قارەمانی و فیداكاری نواند. ئەم قۆناغە بۆ ژنانی كورد لەم بەشەی كوردستان زۆر گرنگە و دەتوانین بڵێین بە پانتاییەكی زیاترەوە هاتنە مەیدانی خەبات و تێكۆشانەوە.
لە درێژەی پەیامی ناوهندی ڕێکخراوهکانی ژنانی رۆژههڵاتی کوردستان بە وردی هەلومەرجی ژنانی کورد، لە دوای هاتنەسەرکاری کۆماری ئیسلامیی و بەشداریی ژنانی رۆژهەڵاتی کوردستانی لە بواری سیاسی و مەدەنی وفەرهەنگی باس کراو هەروەها لەمپەر وگرفتەکانی سەرڕێی ژنانی کورد لەو بەشە لە کوردستان بۆ ئامادەبووان شی کرایەوە.
شایانی باسە ئەو کۆبوونەوە بە دەرکردنی بەیاننامەیەک بۆ ڕای گشتی کۆتایی پێهات.