لە دوای کۆتایی هاتنی هەڵبژاردنەکانی سەرۆککۆماری ٢٩ی بانەمەڕی ئەمساڵ کە باڵی نیزیکتر بە رێبەری نیزام و بناژۆخوازەکان خۆیان بە دۆڕا زانی، ململانێ و ناکۆکییەکانی هەر دووباڵی دەوڵەتی یاسایی و باڵی خامەنەیی پەرەی سەندووەو روو لە زیادبوون دایە.
لە بەرانبەر دەستێوەردانە نایاسایەکانی مافیای سپای پاسداران و هێرشکردنی ئەو ڕێکخراوەیە بۆ سەر دەوڵەتی حەسەن روحانی، بەتایبەتی دوای رووداوی ١٧ی جۆزەردانی تاران سەرۆككۆماری لە چەند لێدوان لەوبارەوە وەدەنگ هات.
بەکار هێنانی دەستەواژەی دەوڵەتی چەکدار، ئاماژەی روحانی بە دەسەڵاتی رەها و هەڵسوکەوتی سەرەرۆیانەی سپای پاسدارانە لە پلان و سیاسەتەکانی کۆماری ئیسلامییە، بەتایبەتی دوای تاقیکردنەوە مووشەکییەکانی سپای پاسداران و گەمارۆنوێیەکانی سەنای ئەمریکا بۆسەر سپا و، هاویشتنی ٦مووشەک بەرەو مۆڵگەی داعش لە سووریە و کێشەنانەوەیان لە نێوخۆی وڵات، کۆی ئەمانە بۆ بە هۆی هەڵوێست گرتنی روحانی. ترسی روحانیش بۆ شکست هێنانی پرۆژەکانی و گرژبوونی ناکۆکیەکانی ئێران وئەمریکا دەگەڕێتەوە بەتایبەتی دوای هاتنە سەرکاری دۆناڵد تڕامپ.
لە بەرانبەر قسەکانی حەسەن روحانیدا، سەردار جەعفەری فەرماندەی گشتیی سپای پاسداران بە توندی وڵامی روحانی داوە و دەوڵەتی روحانی بە کەمتەرخەمیی لە هەمبەر نەیارانی رێژیم تاوانبار کرد.
لە لایەک دیکەش خامەنەیی لەم دواییانەدا لە قسەکانی هەڕەشەی لە سەرۆکۆمار کرد و رووداوەکانی دەیەی ٦٠ و لابردنی سەرۆککۆماری ئەوکات، ئەبولحەسەن بەنی سەدری وەبیر هێناوە.
لە درێژەی ناکۆکییەکانی دەوڵەتی یاسایی و دەوڵەتی شاراوە ، لە رێپێوانی ئاخرین هەینی مانگی رەمەزان کە بە رۆژی فەلەستین ناوزەد کراوە، کۆمەڵێک لیباس شەخسی بە دژی روحانی دورشمیان داو، بە هۆی هێرش کردنی و پەلامار دانی روحانی، لەو شوێنە دوور خرایەوە.
چەند روژ دوای ئەو ڕووداوە، باس لە دەسبەسەرکردنی دوو کەس لە بەرپرسانی مێدیاکانی سەر بە سپای پاسداران کرا، کە هاندەر و دارێژەری هێرش کردن بۆ سەر روحانی بوون.
شروڤەکارانی سیاسی لەو پێوەندییەدا لەسەر ئەو باوەڕەن کە باش نەبوونی تەندروستی خامەنەیی و دەنگ هێنانەوەی روحانی لە هەڵبژاردنەکان، بۆتە هۆی ئەوە کە سپای پاسداران و دەستوپێوەندییەکانی لە سەر داهاتووی ئێران لە ئاستی ڕێبەری نیگەران بن.
لە تازەترین دەمبەدەمە کردنی دەمڕاستەکانی رێژیم عەلی موتەهەری کوڕی مورتزا موتەهەر لە دانانی تویتێک، تانە و لاتاوی لە خامەنەیی و چونیەتی بە ڕیبەر بوونی وەبیرهێناوەتەوە.
رەخنە گرتن لە رێبەری نیزام، ئەو هێڵەسوورە بوو کە چەند ساڵە بڤەیی خۆی لەدەست داوە و لە رووداوەکانی ٨٨ی هەتاوی بەملاوە وەڵایەت فەقیهـ بەرە بەرە جێگە و پێگەی دابەزیوە.