مەسعود بارزانی، سەرۆكی هەرێمی كوردستان ڕایگەیاند یەكپارچەیی خاكی عێراق بەزۆر ناپارێزرێو، هیچ شتێك ڕێگری لە كورد ناكا چارەنووسی خۆی دیاری بكا.
ئەو دەڵێ هەرچەندە ناتوانم كاتەكەی دیاری بكەم، بەڵام كوردستانی سەربەخۆ بەڕێوەیە.
مەسعود بارزانی، لە ناوەندی لێكۆڵینەوەی ئەتڵەنتیك لە واشنتۆن لەپانێڵێكدا وتارێكی پێشكەش كردو گوتی: هاتنی ئەوان بۆ واشنتۆن بۆ گەیاندنی سوپاسی گەلی كوردستانە بە بەرپرسانو گەلانی ئەمریكا لەبەرامبەر پشتیوانیكردنی كورد لەشەڕی دژی داعش.
سەرۆكی هەرێم ئاماژەی ەوە کرد کە پیلانی داعش گرتنی موسڵ و دواتر كوردستان بوو، بەڵام پێشمەرگە بووە كۆسپو شكستی بە پیلانەكەی هێنا، ئێستاش هەست بە شانازی دەكەین كە لەسەر دەستی پێشمەرگە هەیبەتی داعش شكێندراو كوردستان بووە پەناگەی لێقەوماوان.
بارزانی گوتی داعش بە چەكی سوپای سوریەو عێراق هێرشی كردە سەر كوردستان، بەڵام نەك تەنیا لە هەرێمی كوردستان، بەڵكوو لە كۆبانێش پێشمەرگە داعشی تێكشكاند.
لەبارەی ڕاگەیاندنی سەربەخۆییەوە، مەسعود بارزانی، گوتی: یەكپارچەیی خاكی عێراق بەزۆر ناپارێزرێ، هیچ شتێك ڕێگری لە كورد ناكا چارەنووسی خۆی دیاری بكا، هەر چەندە ناتوانم كاتەكەی دیاری بكەم، بەڵام كوردستانی سەربەخۆ بەڕێوەیە.
