پلینۆمی شه‌شه‌می کۆمیته‌ی ناوه‌ندیی حیزبی دێموکڕاتی کوردستان به به‌شداریی سه‌رجه‌م ئه‌ندامانی ئه‌سڵی و جێگر و راوێژکارانی رێبه‌ری له رۆژانی ٢٠ تا ٢٢ی جۆزه‌ردانی ١٣٩٦ی هه‌تاوی (١٠ تا ١٢ی ژووئه‌نی ٢٠١٧ی زایینی) به‌ڕێوه چوو و پاش سێ رۆژ کاری به‌رده‌وام به سه‌رکه‌وتوویی کۆتایی به کاره‌کانی خۆی هێنا.
دوای ساتێك وه‌ستان بۆ رێزگرتن له بیره‌وه‌ریی شه‌هیدانی رێگای رزگاریی کوردستان و په‌سندکردنی ده‌ستووری کاری پلینۆم، بڕگه‌ی یه‌که‌می کاره‌کانی پلینۆم که تایبه‌ت بوو به تاوتوێی گرینگترین بابه‌ته سیاسیه‌کانی ئه‌م دواییانه و ئێستا ده‌ستی پێ کرد.
له سه‌ره‌تای ئه‌و به‌شه‌دا هاوڕێی تێکۆشه‌ر کاک مسته‌فا مه‌ولوودی سکرتێری گشتیی حیزب راپۆرتێکی سیاسیی پێشکه‌ش کرد که له‌ودا وێڕای وه‌بیرهێنانه‌وه‌ی چوارچێوه‌ی گشتیی روانینیی حیزب بۆ مه‌سایلی نێوده‌وڵه‌تی و ناوچه و پارچه‌کانی کوردستان، گرینگیی زیاتر به چه‌ند پرسێکی دیاریکراو درابوو که له ماوه‌ی نێوان دوو پلینۆم و له کاتی گرتنی ئه‌م کۆبوونه‌وه‌یه‌دا هاتوونه پێش و بۆ سیاسه‌تسازیی حیزبی دێموکڕات و بارودۆخی خه‌بات له رۆژهه‌ڵاتی کوردستان کاریگه‌ریی تایبه‌تیان هه‌یه. کۆی ئه‌م راپۆرته‌ش به را و سه‌رنجی به‌شدارانی پلینۆم ده‌وڵه‌مه‌ندتر کرا و وه‌ک روانگه‌ی ره‌سمیی حیزبی دێموکراتی کوردستان بۆ ئه‌م پرسانه فۆرمووله کرا.
گرینگترین بابه‌ته‌کانی نێو راپۆرته‌که و روانگه‌ی حیزبی دێموکڕاتی کوردستان بۆ ئه‌م بابه‌تانه به شێوه‌ی خواره‌ویه:
١/ له پێوه‌ندی له‌گه‌ڵ دوایین هه‌ڵبژاردنی سه‌رکۆماری و شووڕاکانی ئێراندا، حیزبی دێموکڕاتی کوردستان له ده ساڵی رابردوودا (هه‌ر وه‌ک پێشتریش)، له‌گه‌ڵ ئه‌وه‌دا که ئه‌وه‌ی به ناوی هه‌ڵبژاردن له ئێراندا به‌ڕێوه ده‌چێ به هیچ پێوه‌رێک به گونجاو له‌گه‌ڵ ستاندارده‌كانی هه‌ڵبژاردنێکی ئازاد و دێموکڕاتیک نازانێ، به‌ڵام نه‌یویستووه به روانینێکی یه‌کده‌ست و پێشتر قالبکراو مامه‌ڵه له‌گه‌ڵ هه‌موو هه‌ڵبژاردنه‌کان بکا و ئه‌گه‌ر له بڕگه‌یه‌کدا پێی وابووبێ که ده‌رفه‌تێک بۆ نیشاندانی قورسایی و داواکانی خه‌ڵکی کوردستان هه‌یه، به پێویستی زانیوه به کار ببرێ و رێژیمی پێ به چالش بکێشرێ. بۆ هه‌ڵبژاردنه‌کانی ئه‌مجاره به له‌به‌رچاوگرتنی کارنامه‌ی حه‌سه‌ن رووحانی و باس و خواسه‌کانی نێو هه‌ڵمه‌تی هه‌ڵبژاردن، حیزبی ئێمه له‌و باوه‌ڕه‌دا بوو که هیچ هۆکارێک بۆ نیشاندانی رێگای به‌شداری له‌و هه‌ڵبژاردنه‌دا به خه‌ڵک له گۆڕێ نیه. هاوکات، به‌هۆی زه‌مینه‌یه‌ک له کۆده‌نگی و هاوهه‌ڵوێستی که له‌نێو هێزه‌کانی رۆژهه‌ڵاتی کوردستاندا دروست ببوو و سه‌ره‌ڕای جیاواز بوونی سروشت و جه‌زابیه‌تی هه‌ڵبژاردنی شووڕاکان بۆ خه‌ڵک، حیزبی ئێمه هاوشان له‌گه‌ڵ پارته‌کانی دیکه‌ی رۆژهه‌ڵات هه‌ڵبژاردنه‌کانی بایکۆت کرد.
به‌له‌به‌رچاوگرتنی وه‌زعیه‌تی تایبه‌تیی خه‌ڵک له ئێران که هێندێک کۆت و به‌ندی ئیجباری به پرۆسه‌ی هه‌ڵبژاردنیان ده‌به‌ستێته‌وه، هه‌روه‌ها ئه‌وه که بایکۆت یارمه‌تیی به به‌زاندنی زۆر له هێڵه سووره‌کانی که‌مپه‌ینی کاندیداکانی سه‌رکۆماری کرد و به‌پێی ئاماره‌کانی خودی رێژیم رێژه‌ی به‌شداری نه‌کردنی خه‌ڵک له کوردستان له‌چاو سه‌رجه‌م ئێران جێگای سه‌رنجه و رێژه‌ی ده‌نگه باتڵه‌کانیش زۆر بوو، ناکرێ بڵێین هه‌ڵوێستی بایکۆت به ته‌واوی بێ وڵام و بێ به‌رهه‌م بووه. له هه‌مووی ئه‌وانه‌ش بۆ ئێمه گرینگتر ئه‌وه‌یه که جیا له گۆشه‌نیگای بارودۆخی خه‌ڵک له ناوخۆ، له‌و شوێنه‌دا که هێزه‌کانی رۆژهه‌ڵات زه‌مینه‌ی یه‌کده‌نگی و هاوخه‌باتییان له‌نێواندا هه‌یه پێویسته یارمه‌تی به گه‌شه‌کردن و به‌رهه‌مدار کردنی وه‌ها زه‌مینه‌یه‌ک بکرێ. به‌ڵام هه‌ر له‌و کاته‌دا پلینۆم ئیشاره‌ی به که‌موکوڕییه‌کانی هاوهه‌ڵوێستیی هێزه سیاسییه‌کانی رۆژهه‌ڵات چ له‌بواری خوێندنه‌وه‌ی وردتری بارودۆخی ناوخۆی وڵات و چ له‌پێوه‌ندی له‌گه‌ڵ مێکانیزمی به‌دواداچوون و به‌کرده‌یی کردنی ئه‌م هاوهه‌ڵوێستییه‌دا کرد و له‌و باوه‌ڕه‌دا بوو که له هه‌لومه‌رجی ئێستادا کۆده‌نگی و یه‌کڕیزیی هێزه سیاسیه‌کانی رۆژهه‌ڵات له ریزی ئه‌وله‌وییه‌ته‌کاندایه و شیاوی ئه‌وه‌یه که ئه‌گه‌ر پێویست بوو حیزبی ئێمه له‌پێناویدا هێندێک جار چاوپۆشی له تایبه‌تمه‌ندیی روانینه‌کانی خۆیشی بکا، به‌ڵام هه‌ڵوێستی هاوبه‌ش پێویسته له‌سه‌ر روانینی هاوبه‌ش بنیات بنرێ و هه‌موو لایه‌نه‌کان وێڕای دۆزینه‌وه‌ی مێكانیزمی راسته‌قینه‌ی کاری هاوبه‌ش، وه‌کیه‌ك یارمه‌تی به لێک نزیک بوونه‌وه‌ی خوێندنه‌وه‌کان بکه‌ن.
٢/ له‌پێوه‌ندی له‌گه‌ڵ چڕبوونه‌وه‌ی فشاره‌کانی ئیداره‌ی دۆنالد ترامپ بۆ سه‌ر ئێران که کێشه‌ی قه‌ته‌ر به‌رهه‌می راسته‌وخۆی ئه‌و ئاقاره تازه‌یه‌یه، حیزبی ئێمه هه‌ر چه‌شنه فشارێکی نێوده‌وڵه‌تی بۆ سه‌ر کۆماری ئیسلامی که ببێته هۆی کورتکردنه‌وه‌ی ده‌ستی تێکده‌رانه‌ی کۆماری ئیسلامی له ناوچه‌دا (شتێک که رێژیم هه‌میشه وه‌ک باشترین ده‌سته‌به‌ری مانه‌وه‌ی خۆی و درێژه‌کێشانی داخران و سه‌ره‌ڕۆیی به‌کاری بردووه)، به شتێکی باش ده‌زانێ. هه‌ر له‌و کاته‌دا، وێڕای هیوادار بوون به‌وه که ئاجێندای نێوده‌وڵه‌تی ته‌نیا له خانه‌ی ئه‌منیه‌تی رۆژهه‌ڵاتی نێوه‌ڕاسته‌وه بۆ ئێران و ره‌فتاری کۆماری ئیسلامی نه‌ڕوانێ و گۆڕینی ره‌فتاری ئه‌و رێژیمه له به‌هێزبوونی بزوتنه‌وه‌ی ئازادیخوازی و بزوتنه‌وه‌ی مافخوازانه‌ی گه‌لانی ئێرانیشدا ببینێ، ئێمه له‌و باوه‌ڕه‌داین که بزوتنه‌وه‌ی کورد له رۆژهه‌ڵاتی کوردستان پێویسته پێش هه‌موو شتێک خۆی به‌هێز و یه‌كگرتوو بکا و به یه‌کگرتووییش هه‌وڵ بدا که سه‌رنج و روانینی کۆمه‌ڵگای نێوده‌وڵه‌تی بۆ لای خۆی وه‌ک فاکته‌رێکی گرینگی ئاینده‌ی ئێران و ناوچه رابکێشێ.
٣/ سه‌باره‌ت به هێرشه‌کانی رۆژی ١٧ی جۆزه‌ردانی تاران بۆ سه‌ر باڵه‌خانه‌ی مه‌جلیس و ده‌وروبه‌ری گۆڕی خومه‌ینی و ئاشکرا بوونی ئه‌وه که به‌شێك له به‌ڕێوه‌به‌رانی ئه‌و کرده‌وه تێرۆریستیانه کوردزمان بوون، حیزبی ئێمه له‌گه‌ڵ ئه‌وه‌دا که بۆخۆی به ده‌یان و سه‌دان جار قوربانیی تێرۆریزمی کۆماری ئیسلامی بووه، به‌ڵام تێرۆریزم له هه‌ر شكڵ و شوێنێک وه‌ک کارێکی نائینسانی و مه‌حکووم چاو لێ ده‌کا. هاوکات ئێمه له‌سه‌ر به‌رپرسایه‌تیی خودی رێژیم له دروستبوونی زه‌مینه‌ی به‌ڕێوه‌چوونی ئه‌و هێرشانه پێ داده‌گرین. کۆماری ئیسلامی نزیک به ده‌هه و نیوێکه که هه‌م به مه‌به‌ستی لێدانی حزووری هێزه‌کانی ئه‌مریکا له عیراق و دواتریش له چوارچێوه‌ی یاریی گوماناویی خۆی له قه‌یرانی سوریه‌دا و هه‌م وه‌ک کارتێکی دژایه‌تیی وه‌دیهاتنی خه‌ونه‌کانی کورد به‌گشتی و لاوازکردنی بزوتنه‌وه‌ی سیاسیی رۆژهه‌ڵاتی کوردستان و هه‌ڵگێڕانه‌وه‌ی لاوانی کورد له هه‌ستی نه‌ته‌وایه‌تی، ده‌رفه‌تی هه‌ڵدان و گه‌شه‌کردن و چالاکیی تێرۆریستیی گرووپه سه‌له‌فی و ته‌کفیرییه‌کانی پێک هێناوه. ته‌نانه‌ت پاش ئه‌و راپۆرته‌ش که سێ ساڵ له‌مه‌وبه‌ر حیزبی ئێمه سه‌باره‌ت به چالاکیی ئازادی ئه‌ندامانی داعش له هێندێک شوێنی رۆژهه‌ڵاتی کوردستان بڵاومان کرده‌وه و له‌وێدا ته‌نانه‌ت ناوی یه‌كێک له ئه‌نجامده‌رانی هێرشه‌کانی تاران هاتبوو، چاوپۆشی و رێگه‌پێدانی به‌ئه‌نقه‌ستی چالاکیی ئه‌م گرووپانه هه‌روا درێژه‌ی هه‌بووه به‌له‌به‌رچاوگرتنی ئه‌وه که ناوچه‌ی هه‌ڵدان و چالاکیی ئه‌م گرووپانه به توندی له‌ژێر چاوه‌دێریی ده‌زگا ئه‌منیه‌تییه‌کانی رێژیمدا بووه، ناکرێ ئه‌و ده‌زگایانه ئاگاداری ئه‌گه‌ری به‌ڕێوه‌چوونی ئه‌و هێرشانه نه‌بووبن، ئه‌و جیا له‌وه که کات و ساتی به‌ڕێوه چوون و شێوازی باسکردن و مامه‌ڵه له‌گه‌ڵ ئه‌م هێرشانه له‌لایه‌ن کاربه‌ده‌ستانی رێژیمه‌وه به گومانه‌کان زیاد ده‌که‌ن.
له کاتێکدا که فشاره نێوده‌وڵه‌تییه‌کان بۆ سه‌ر کۆماری ئیسلامی به‌تایبه‌تی له که‌نداو له جاران زیاتر چڕبوونه‌وه و هه‌ڵبژاردنه‌کانی ئه‌م دواییانه‌ی ئێرانیش بوونه ده‌رفه‌تی به‌زاندنی کۆمه‌ڵێک هێڵی سوور، رێژیم و به‌تایبه‌تی ناوکی سه‌ره‌ڕۆیی له‌م هێرشانه بۆ ئه‌وه که‌ڵک وه‌رده‌گرێ که هه‌م به‌ڕووی جیهانی ده‌ره‌وه‌دا خۆی وه‌ک قوربانیی تێرۆریزم نیشان بدا، هه‌م کۆنتڕۆڵی قایمتری فه‌زای سیاسیی ناوخۆی ئێراندا بکا. له هه‌مووی گرینگتر و هه‌ستیارتر بۆ ئێمه وه‌ك گه‌لی کورد ئه‌وه‌یه که رێژیم جیا له‌وه که تێده‌کۆشێ گرژی و ناته‌بایی له‌سه‌ر بنه‌مای مه‌زهه‌بی له‌نێو خه‌ڵکی کوردستاندا دروست بکا، هه‌وڵیش ده‌دا بزوتنه‌وه‌ی شۆڕشگێڕیی کوردستانیش به تێرۆریست نیشان بدا و له‌و ده‌رفه‌ته بۆ رووشاندنی روخساری کورد و سه‌رکوتی زیاتر چالاکانی سیاسی و مه‌ده‌نی که‌ڵک وه‌رده‌گرێ. هه‌مووی ئه‌مانه وا ده‌که‌ن که هێز و بژارده سیاسی و مه‌ده‌نییه‌كانی کورد له رۆژهه‌ڵاتی کوردستان به حیکمه‌ت و یه‌کگرتوویی و به‌رپرسیارییه‌وه مامه‌ڵه له‌گه‌ڵ دۆخه‌که بکه‌ن و پیلان و نیازه‌کانی رێژیمیش له‌لای بیروڕای گشتیی ئێرانی و نێونه‌ته‌وه‌یی له‌قاو بده‌ن.
٤/ له‌پێوه‌ندی له‌گه‌ڵ ساغبوونه‌وه‌ی سه‌رۆکایه‌تیی هه‌رێمی کوردستان و زۆربه‌ی هێزه سیاسییه‌كانی کورد له باشووری کوردستان له‌سه‌ر به‌ڕێوه‌بردنی رێفراندۆمی سه‌ربه‌خۆیی، کۆمیته‌ی ناوه‌ندی وێڕای ده‌ڕبڕینی خۆشحاڵی و پێشوازی له یه‌كده‌نگی و یه‌کڕیزیی هێزه سیاسییه‌کانی باشووری کوردستان، ئه‌و پرۆسه‌یه به بنیاتنراو له‌سه‌ر مافی ره‌وای کورد بۆ دیاریکردنی چاره‌نووسی خۆی و به ئاکامی سروشتیی ره‌وتێکی دوور و درێژ له نه‌خوێندنه‌وه‌ی کورد له ئاستی ناوه‌ندیی عیراق و جێبه‌جێ نه‌کردنی پره‌نسیپه‌کانی رێککه‌وتن و هاوبه‌شی له به‌ڕێوه‌بردنی عیراقدا چاو لێ ده‌کا. حیزبی ئێمه پیرۆزبایی و پشتیوانی له ئیراده‌ی کورد له باشووری کوردستان ده‌کا و هیواداری ده‌رده‌بڕێ که نه‌ته‌وه‌که‌مان له باشووری کوردستان به هه‌موو رێگایه‌کی پێویست و به‌تایبه‌تی له‌رێگای یه‌کخستنی زیاتری ناوماڵی کورد رووبه‌ڕووی چالشه‌کانی به‌رێوه بردنی ریفراندۆم و قۆناغه‌کانی دوای ریفراندۆم ببێته‌وه.
بڕگه‌ی دووه‌می کاره‌کانی پلینۆم بۆ باسی چالاکتر کردن و رێکخستنی زیاتری تێکۆشان و کاروباری حیزب دیاری کرابوو. له‌و به‌شه‌دا گه‌ڵاڵه‌یه‌ک که پلانی کار و کۆمه‌ڵێك پره‌نسیپ بۆ تێکۆشان و کاروباری له‌مه‌ودوای حیزبی تێدا هاتووه، پاش گفتگۆ و تێبینیی به‌شدارانی پلینۆم بۆ جێبه‌جێکردن به په‌سند گه‌یشت.
له به‌شێكی دیکه‌ی کاره‌کانی پلینۆمدا پرسی نێوان دێموکڕاته‌کان و پرۆسه‌ی یه‌کخستنه‌وه‌ی بنه‌ماڵه‌ی گه‌وره‌ی دێموکڕات هاته به‌ر باس. له‌و به‌شه‌دا پاش راپۆرتی ده‌فته‌ری سیاسی سه‌باره‌ت به ناوه‌رۆک و ئاکامی دوایین گفتگۆکانی نێوان دوو لایه‌ن، رێبه‌ریی حیزب سه‌رنج و تێبینییه‌کانی خۆی له‌و پێوه‌ندییه‌دا دایه‌وه ده‌فته‌ری سیاسیی حیزب و چوارچێوه‌ی روانینی حیزبی بۆ دیالۆگێکی به‌رهه‌مدار و یه‌كگرتنه‌وه‌یه‌کی راسته‌قینه دیاری کرد.
دوایین به‌شی کاره‌کانی پلینۆمی شه‌شه‌می کۆمیته‌ی ناوه‌ندیی حیزبی دێموکراتی کوردستان بریتی بوو له باسکردن له کۆمه‌ڵێك پرسی نێوخۆیی و ته‌شكیلاتی. له‌و به‌شه‌شدا پاش گفتگۆیه‌کی ده‌وڵه‌مه‌ند، پلینۆم به به‌رپرسیاری و یه‌کده‌نگییه‌وه ئاکامی پێویست و بڕیاری گونجاوی له‌سه‌ر وه‌رگرتن.
ده‌فته‌ری سیاسیی حیزبی دێموکڕاتی کوردستان
٢٣ ی جۆزه‌ردانی ١٣٩٦ (١٣ی ژووئه‌نی ٢٠١٧)
