بەشداریی هەیئەتێکی حیزبی دێموکراتی کوردستان‌و یەکیەتی ژنانی دێموکراتی کوردستان لە یادی ٢٧ ساڵەی ئه‌نفالکراوانی کۆیە

هەیئەتێکی حیزبی دێموکراتی کوردستان‌و یەکیەتی ژنانی دێموکراتی کوردستان لە ڕێوڕه‌سمێکدا که‌ بۆ یادی ٢٧ ساڵەی قوربانیانی ئه‌نفال له‌ ناوچه‌ی کۆیە ڕێکخرابوو، به‌شدارییان کرد.
رۆژی دووشەممە، ١٤ ی بانه‌مه‌ڕ وەزارەتی شەهیدان‌و ئەنفالکراوان‌و رێکخراوی کۆژین بۆ یادی ٢٧ ساڵەی ئەنفالی سنووری کۆیە ڕێوڕه‌سمێکی لە ژێر درووشمی “تاوانەکانی داعش، تەواوکەری تاوانەکانی ئەنفالی بەعسە” لە سەر مۆنۆمێنتی ئەنفال لە کۆیە پێکهێنا.
له‌و ڕیوڕه‌سمه‌دا هەیئەتێکی حیزبی دێموکراتی کوردستان بە سەرپەرستیی سۆهەیلا قادری، ئەندامی رێبەریی حیزب‌و بە هاوڕێیەتی ئەبوبەکر ئەحمەدپوور، بەرپرسی بەشی شەهیدانی کۆمیسیۆنی کۆمه‌ڵایه‌تیی حیزب‌و شادی ویژدانی، ئەندامی جێگری بەڕیوەبەریی یەکیەتیی ژنانی دێموکراتی کوردستان بەشدارییان تێدا کرد‌و پەیامی حیزبی دێموکراتی کوردستان ‌و یەکیەتیی ژنانی دێموکراتی کوردستانیان به‌و بۆنه‌یه‌ پێشکەش بە به‌ڕێوه‌به‌رانی ئه‌و کۆڕیادە کرد.
له‌و ڕێوڕه‌سمه‌دا پەیامی وەزارەتی شەهیدان‌و ئه‌نفالکراوانی حکومەتی هەرێمی کوردستان‌و پەیامی بەرپرسی ناحیەی ئاشتی ‌و هەروەها کۆمەڵێک لەو پەیامانەی بۆ ئەم یادە هاتبوون خوێندرانەوە.
له‌ درێژه‌ی ئه‌و ڕێوڕه‌سمه‌دا کۆمەڵیک بڕگەی ئەدەبی‌و هونەریی پێشکەش بەم یادە کران‌و له‌ کۆتاییدا لە لایەن بەشداربوانەوە تاجە گوڵی وەفاو ٢٧ چه‌پکه‌گوڵ‌و ٢٧ ئاڵای کوردستان لەلایەن خوێندکارانەوە لەسەر مۆنۆمێنتی ئەنفال داندراو یادو بیره‌وه‌ریی شه‌هیدان‌و ئه‌نفالکراوان به‌رز ڕاگیرا.