گیان لەدەستدانی کەسێک لە مەریوان کە بەدووی ئاسەوارە مێژووییەکانەوە بووە

کەسێک لە مەریوان کە وەدووی دانەوەی زەوی بۆ دۆزینەوە ئاسەوانە مێژووییەکانەوە بووە، گیانی لەدەست دا.
بەپێی ڕاپۆرتی پەیامنیری کوردستان‌و کورد کەسێک لە مەریوان بە ناوی عیززەت مرادی کە لە ناوچەی دارسەیران بە تەمای دۆزینەوەی ئاسەواری مێژوویی زەویی هەڵکۆڵیوە، ئەو چاڵەی هەڵیکەندوە بەسەریدا رووخاوەو بەو هۆیەوە گیانی لەدەست داوە.
هەواڵی گیانلەدەستدانی عیززەت مرادی بەو هۆیە لە حالێکدا بڵاو دەبێتەوە کە پێشتر زۆرجار گوتراوە کە بەرپرسانی حكوومەتی و ناوەندە دەسەڵاتدارەكان دەستیان لە هەڵدانەوە و بە تاڵانبردنی ئاسەوارە بە نرخەكانی كوردستاندا هەیە.
ماوەیەک لەمەوبەریش رێکخراوی مافی مرۆڤی کوردستان لە بەیاننامەیەکدا بڵاوی کردبۆوە کۆمەڵێک نامە و سکاڵای بەدەست گەیشتووە، کە باسیان لە کۆمەڵێک کەس و گرووپی سەربە حکوومەت و دەسەڵات کردووە، کە لە ماوەی 30 ساڵی رابردوودا بە مەبەستی قاچاخ‌و فرۆشتنی عەتیقەو ئاسەوارە کۆنە مێژووییەکان، سەدان تەپۆڵکە‌و شوێنەواری مێژوویی کوردستانیان هەڵداوەتەوە.