رۆژی هەینی ٨ی بانەمەڕ لە کاناڵی یەکی دەنگ ورەنگی کۆماری ئیسلامی دیبەتی نێوان ٦ بەربژێری سەرۆک کۆماری بۆ هەڵبژاردنەکانی ٢٩ی بانەمەڕ دەستی پێکرد و هەرکام لە بەربژێرانی لە بواری ئابووری و فەرهەنگی وئەمنیەتییەوە قسەوباسی خۆیانیان خستەڕوو.
یەکەم خاڵی جیگای سەرنج لە مونازەرەکان ئەوە بوو کە کارنامەی چوار ساڵەی روحانی و وەدی نەهاتنی وادە وبەڵینیەکانی تەنانەت لەلایەن دەمڕاستەکانی نیزامەوە رەخنەی توندی لێ گیرا.
بە پێی ڕاپۆرتی رویتێرز بە هۆی ناکارامەیی دەوڵەتی روحانی لە چوارساڵی رابردوودا، لە بواری چارەسەری گیروگرفتەکانی ئابووریی و پاساو هێنانەوە کە گرفتەکانی هی دەوڵەتی پێشووترە، رەنگە لە هەڵبژاردنەکانی ئەمساڵ بە شێوەی بەرچاو دەنگەکانی لە کەمیی بدا
چونکە دەوڵەتی روحانی دەوڵەتی قسە بووە، هەتا کردەوە.
لە دیبەیتی تایبەت بە بەربژێرانی سەرۆککۆماریدا، بەرچاوبوونی قەیرانی ئابووریی وسیاسیی ئێران لە قسەو رەخنەی بەربژێران دەرکەوت و، ئەگەرچی رێبەری نیزام خامنەیی پێشتر هوشداری دابوو کە بەربژێران هەوڵی یەکتر رووشاندن نەدەن و نەبنە هۆی دووپاتبوونەوەی رووداوەکانی ساڵی ٨٨ی هەتاوی، بەڵام سەرەڕای ئامووژگاریی وهوشداری خامنەیی، بەربژێران دەستیان دایە یەکدی تاوانبارکردن و دان پێدان بە هەبوونی دەیان گرفتی ئەمنی وئابووری وفەرهەنگی لە ئێران.
سەید مستەفا میرسەلیم لەو دیبەیتەدا ڕایەگەیاند پتر لە ١٠ملوێن نەخوێندەوار لە ئێران هەیەو قالیباف بەربژێری دیکە گوتی؛ سەتا ٩٦ خەڵکی ئێران لە سروەت وسامانی ئەو وڵاتە بێبەش کراون و، ئیبراهیم رەئیسی لە قسەکانی دا هەبوونی ١٦ملوێن پەرواێز نشینی لە ئێران خستە ڕوو.
لە یەکەم دیبەتی بەربژێرانی سەرۆکۆماریدا تاوانبارکردنی هەرکام لە بەرپرسان و دەمڕاستەکانی نیزام بە کەمکاری و درۆکردن وچەواشەکاری بۆ بەهۆی هەڵچوون و تووڕەیی بەربژێران و لە یەکەم هەڵوێست لەو پێوەندیەدا ، ستادی بانگەشەی قالیباف، حەسەن روحانی کە لەو دیبەیتە حاشای لەوە کرد کە گوتویەتی ٤٠٠٠ دەرفەتی کار دەخوڵقێنێ، بە درۆزن لە قەڵەم داو، داوای کردوە کە فیلمی وتوێژەکەی لەو بارەوە بڵاو بکرێتەوە.
خاڵی جێگای سەرەنج ئەوەیە هیچکام لە بەربژێران و کاربەدەستانی کۆماری ئیسلامی ئاماژەیان بە تێچووی پتر لە ٤٠میلیارد دۆلاری بە هۆی بەشداریی کردن لە شەڕی سووریەیان نەکرد، کە بەشێکە لە قووڵبوونی قەیرانی ئابووریی ئێران.
جێی ئاماژەیە بانگەشەی هەڵبژاردنەکانی سەروککۆماری و شورای شاروگوندەکان لە کەشوهەوایەکی سارد وبێ پیشوازی خەڵک لە رۆژی ٧ی بانەمەڕەو لە ئێران دەستی پێکردوە، هەبوونی قەیرانی بەرچاوی ئابووری وسیاسی ، چارەسەر نەبوونی گرفتی خەڵک لە هیچکام لە دەوڵەتەکان بووتە هۆی نائومێدی و دڵساردی خەڵکی ئێران لە هەڵبژاردنەکان و دروشم و بانگەشەی بەربژێران.