ئەرتەشی ڕێژیمی كۆماری ئیسلامیی ئێران نایەڵێ جادەی گرینگی نێوان سەرپێلی زەهاو و دالاهوو بەرین بكرێتەوە.
بەدوای ڕاگرتنی پڕۆژەی بەرینكردنەوەی جادەی ئابووریی نێوان سەرپێلی زەهاو ـ داڵاهوو لە پارێزگای كرماشان كە بۆ بازارچەی پەرویزخان دەچێو، ماشێنە بارهەڵگرو نەوتكێشەكانی عێراق شەوو ڕۆژ لە هاتوچۆدان؛ شورای شاری سەرپێلی زەهاو لە نامەیەكدا ناڕەزایەتیی خۆیان بەو بڕیارە دەربڕیوە.
لە بەشێك لەم نامەیەدا ڕوو بە پارێزگاری كرماشان نووسراوە کە بە هۆی تەسکبوونی ڕێگا لە سەرپێلی زەهاووە بۆ گەردەنەی “پاتاق”و؛ قەرەباڵغیی زۆر تا ئێستا چەندین جار ڕوودای دڵتەزێن لەو شوێنە ڕووی داوە، بۆ نموونە لە ڕووداوێكدا ٢٠ كەس بوونە قوربانی بەڵام بەداخەوە بە هۆی ڕێگریی ئەرتەش ئەم پڕۆژەیە سەرلەنوێ ڕاگیراوە.
لەم نامەیەدا كە بۆ پارێزگاری كرماشان نێردراوە، شورای سەرپێلی زەهاو بەوپەڕی داماوی نووسیویانە کە بە خاتری خودا داوا دەكەین لێگەڕێن با ئەم کێشەیەی خەڵك چارەسەر بكەینو بێتوو ئاوا بڕواتە پێشێ پێشبینیی ئەمە دەكرێ لە داهاتوودا ئەرتەش رێگە نەدا بەبێ ئیزنی ئەوان شەقامو كۆڵانەكانی نێو شاریش بەرین بكەنەوە.
شاری سەرپێلی زەهاو بە حەشیمەتی زیاتر لە ١٠٠ هەزار كەس لە٢٥ كیلۆمیتریی سنووری عێراق هەڵکەوتووەو ئەم شارە یەكێك لە هەژارترینو بێبەشترین ناوچەكانی کوردستان لە ڕۆژاوای ئێرانە.
