١٨ رۆژ خۆڕاگریی خەڵکی دۆڵی سماقانی مەریوان

خەڵکی خۆراگری دۆڵی سماقان و گوندەکانی ئەو دەڤەرە پتر لە ١٨ رۆژە لە ژێر رەهێڵەی باران و سەرما و سۆڵە بەرانبەر بە هەڵوێستی دژە ژینگەی شارەداری مەریوان مانیان گرتووە.
خەڵکی گوندەکانی سەرشێو و سماقانی مەریوان دەچێ بۆ سێ حەوتە بە خۆپێشاندان و مانگرتن لە دۆڵی سماقان رێگەیان نەداوە ژینگەی جوان و رازاوەی ئەوبەشە لە کوردستان بە هۆی پلان و بەرنامەی هەڵەی شارەداری مەریوان کە دەیهەوێت بیکاتە جێی زبڵ وپاشماوەکان لە ناو بچێت.
بە پێی راپۆرتی ماڵپەڕی ژینگەوان، دوای ئەوەی کە شارەداری مەریوان دەیهەوێت ژینگەی دۆڵی سماقان لە ناوببا، خەڵکی  ئەو دەڤەرە بە هاوکاری وپاڵپشتی ژینگەپارێزان لە شوێنە کۆبوونەتەوەو بە شەو و بە رۆژ رێگەیان نەداوە ئەو ژینگە و شوێنە گەشتیارییە لە ناو ببەن.
شارەداری مەریوان بۆ ئەوەی خەڵکی شاری مەریوان و دەڤەری سماقان رووبەروو یەک بکاتەوە بە ئەنقسەت لە کۆکردنەوەی زبڵ و زاڵی نێو شار کەمتەرخەمیی دەکا و هەربۆیە ژینگەپارێزان و چالاکانی مەدەنی دوایان لە خەڵک کردوە ئاگاداری ئەو پیلانەش بن.
زانیارییەکان باس لەوە دەکەن خەڵکی گوندەکانی سەرشێو و سماقان لە ژیر باران و سەرما پێشیان لە لۆدرو ماشینەکانی شارەداری گرتووە و تائێستاش ١٥ کەسیان دەسبەسەرو هەروەها چەند کەسی دیکەش لە مانگرتووان بە هۆی سەرماوە، نەخۆش کەوتوون.
خۆڕاگری و بوێری خەڵکی ژینگە ویستی دەڤەری سماقان پاڵپشتی کردنی گرووپ و سینفە جیاجیاکانی  کوردستانی لێکەتووتەوە.
شەریف باجوەر ئەندامی ئەنجومەنی ژینگەپارێزی سەوزە چیای مەریوانیش وێڕای بڵاوکردنەوەی بەیاننامەیک دووجاریش سەردانی خەڵکی نارازی ئەو ناوچەیەی کردوە و پاڵپشتی لە ویست وداواکارییەکانی خەڵکی کردوە.

خوێندکارانی زانکۆی پەیام نوور، گرووپی شانۆی مەریوان، ژینگە پارێزانی شار و ناوچەکانی کوردستان  پشتیوانی خۆیانیان لە هەڵوێستی خەلکی دۆڵی سماقان دەربڕیەوە.
هەروەها ژینگەپارێزانی مەریوانی دوایان لە سەرجەم میدیا کان کردوە، هەواڵی ئەو خۆپێشاندانە بە ڕاگەیاندن بکرێ و لە کپی و بێ‌دەنگی‌دا نەمنێتەوە.

 

1 لە 11

- +

1.

2.

3.

4.

5.

6.

7.

8.

9.

10.

11.