بە پێی هەواڵی گەیشتوو لە شاری بانە شەوی ١١ی خاکەلێوە لە ژێر ناوی ” لە گەڵ چرۆ دەگەشینەوە” کۆڕە شێعرێکی بەربڵاو بەڕێوە چوو.
لە کوڕە شێعرە کە لە رۆژانی سەرەتای وەرزی ژیانەوە سروشت و نەورۆزی کوردەواریی پێکهاتبوو ، وێڕای خوێندنەوەی چەندین شێعر لە لایەن قەڵەمبەدەستان و شاعیرانی کورد، لە بەشێک لە تێکۆشەرانی بواری فەرهەنگ وئەدەب رێز گیرا
شایانی باسە لەو شەوشێعرەدا، هۆگرانی وێژەو ئەدەبی کوردیی لە شارەکانی بانە ، سەقز، بۆکان، دیواندڕە، سنە، کامیاران، مەریوان، نەغەدە، شنۆ و پیرانشار بە شدار بوون.
جێیوەبیرهێنانەوەیە پێوەندی فەرهەنگی شار و ناوچە جیاجیاکانی کوردستان کە لەسەردەستی چالاکانی فەرهەنگی و کۆڕو کۆبوونەوە ئەدەبییەکان هاتووتە ئاراوە، لە گەشەی زمان و ئەدەبی کوردی و گشتاندنی هەست وسۆزی نیشتمانپەروەری کاریگەریی بەرزو ئەرینی داناوە.
هەروەها بە پێی هەواڵێکی دیکە لە درێژەی کارو چالاکییەکانی کۆڕی فەرهەنگی و زانستی “ئەدەب”ی شاری بۆکان ، بەڕێوەبەرانی دڵسۆزو چالاکی ئەو ڕێکخراوە فەرهەنگییە لە ئاوایی بۆبۆکتانی ناوچەی سەقز کێبخانەو پۆلێکی فێرکردنی خوێندن و نووسین بە زمانی کوردییان کردەوە.
دوانیوەڕۆی رۆژی ١١ی خاکەلێوە بە دەستپێشخەری ڕێکخراوی فەرهەنگی وزانستی ئەدەب، و بە ئامادەبوونی خەڵکی ئاوایی بۆبۆکتان و بەشێک لە کەسایەتیە ئەدەبی وفەرهەنگییەکانی بۆکان و سەقز، کتێبخانەیەک و پۆلێک بۆ ڕاهینان و فێرکردنی زمانی کوردی لەو گوندە کرایەوە.
لەو رێورەسمە فەرهەنگییەدا بەشێک لە شاعیران و نووسەرانی بەشدار، شێعر و وتاریان خوێندەوە.
لە بڕگەیەکی دیکەدا گرووپی سروودی کچان و کۆرانی گوندی بۆبۆکتان بە سروودی نەورۆزییەوە کۆڕەکەیان ڕازاندەوە.