شارەدێی خوشناو وتێکۆشەرپەرەوەری تەنگیسەر، نزیک بە ٢٠ هەزار کوردی لە ژێر دروشمی “ئێمە پێکەوە جوانین ” بە دەور ئاگری نەورۆز و سەمای جامانەکان کۆ کردەوە.
نەورۆزی بێوێنەی ئەمساڵ بوو بە نوێنگەی هەست وسۆزی کوردانەو شۆڕشگێرانەی خەڵکی کورد لە رۆژهەڵاتی کوردستان و، دوای تێپەڕبوونی یەک حەوتە لە بەهار، رێورەسمەکان هەربەردەوامن و ئاگری نەورۆزیش هەر گەشاوەیە.
رێورەسمی نەورۆز لە شارەدێی مێژوویی تەنگیسەر، هەڵکەوتوو لە ناوچەی ژاوەرۆی سنە، دوای ئەوەی کە بە هۆی کەش وهەوای بارانی بەهاری ، لەلایەک دیکەش رێگەنەدان وپەکخستنی رێورەسمەکە لەلایەن ناوەندە حکوومییەکانەوە حەوتەیەک وە دواخرا ، رۆژی ڕابردوو لەو پارچە بەهەشتە کە بە خوینی شەهیدانی سوورخەڵاتی ئاوەدانە، ئاگری نەورۆز باڵای کرد و، کوردانی هەر چوار پارێزگەی رۆژهەڵاتی کوردستان بە هاوشانی ویەکریزییەوە ،رێزیان لە نەورۆزی نەتەوەیی گرت.
بە پێی ڕاپۆرتی هەواڵنێری کوردستان وکورد، لە شارەدێی تەنگیسەر رۆژی ٨ی خاکەلێوە دوای ئەوەی بەڕێوەبەران وڕێکخەرانی رێورەسمی نەورۆز، ملیان بە تەنگەژە وکۆسپەکانی ناوەندە حکوومییەکان نەدا، بەشێوەیەکی ڕێکوپێک وبێوێنە ئەو رێورەسمەیان بەڕێوە برد و بەهار و نەورۆزێکی جێیهیوا و ئومێدیان لە باوەش گرت.
لەو رێورەسمەدا بەشداریی بەرفراوانی خەڵکی کوردستان لە شارو گوندو ناوچە جیاجیاکان، شکۆیەکی تایبەتی بەو رێورەسمە بەخشی و، جارێکی دیکە خەڵکی رۆژهەڵاتی کوردستان ڕاشكاوانە پەیامی خۆیانیان هەم بە نەیاران و دوژمنانی کورد گەیاند، بەهەم خەمخۆران و تێکۆشەرانی گەلەکەیان.
تەنگیسەری خەمڵیو لە جوانی و، سەربەرز لە جوامێری وفیداکاری، هەزاران کەسی لە خەڵکی بەهەست وسۆزی کوردی لە ئامێزگرت و، بنەماڵەی سەرفەرازی شەهیدانی رێگەی ئازادی وسەربەستی ، بە گوڵ وشیرینیەوە پێشوازییان لە مێوانان وبەشداربووان کرد.
جێی وبیرهێنانەوەیە ئەو شارەدێیە ٧٠ چەپکەگوڵی پێشکەش بە بارەگای بەهاری ئازادی کردوە.
زانیارییەکان باس لەوە دەکەن ئەمساڵ لە مل کردنی جامانە لە بۆنەکانی نەورۆز بۆ بە ڕەمزو پەیامی یەکگرتوویی چالاکانی مەدەنی وسیاسی و لە لایەک دیکەش هاتنە مەیدانی خەڵک بە بەرفەراوانیەوە ،باسی لەوە دەکرد هەرچەشنە تەبایی لایەنە سیاسی و مەدەنییەکان لەسەر یەکریزی وپێکەوەبوونی خەڵک کاریگەریی ئەرینی دادەنێ.
نەورۆزی ئەمساڵ لە ناوچە جیاجیاکانی کوردستان بەتایبەتی نەورۆزی شۆڕشگێرانەی تەنگیسەر کە لێوانلێو بوو لە سۆزداری بۆ نیشتمان و سەمای جامانەکان و هەڵپەرکێی وەک نمادی یەکگرتوویی و شەماڵەی ئاگری نەورۆزیی، هیوای سەرکەوتن و سەربەستی زیاتری خستە دڵی هەموو خەمخۆران و تێکۆشەرانی نیشتمانەوە.