بەپێی ڕاپۆرتی کۆمەڵەی مافی مرۆڤی کوردستان و ماڵپەڕی ژینگەوان ، ژینگە پارێزان و خەڵکی مەریوان ، بۆ پاراستنی ژینگەی دۆڵی سماقان مانیان گرت و بە خۆپێشاندان رێگەیان نەدا کە شارەداری مەریوان دۆڵی سماقان بکاتە جێگەی زبڵ و پاشماوەکان
ژینگە پاریزانی مەریوانی بەتایبەتی خەڵکی دەوروبەری دۆڵی سماقان کاتێک زانیان شارەداری مەریوان دەیهەوێ زبڵخانە لە دۆڵی سماقان ساز بکات ، بە مەبەستی بەرگری کردن لەو پلانەی شارەوانی و بەرگری لە بە زبڵ کردنی گوند و ژینگەکەیان ، بۆ ماوەی زیاتر لە ۸ رۆژە شەو و رۆژ لە ژێر باران و سەرمادا لە دوڵی سماقانی مەریوان مانیان گرتووە و رێگایان بە هێزەکانی دەوڵەت نەداوە ژینگەی دۆڵی سماقان بۆ دروست کردنی جێگای زبڵ لە ناو بەرن. خەڵکی دێهاتی بەردەڕەش ، کلە، کومارە ڕەنگو ، دووپلوورە ،بە کۆبوونەوە و مانگرتن یاریدەری مانگرتوان بوون تاوەکو شارەداری مەریوان دۆڵی سماقان نەکاتە جێی بەرماو و خۆڵ.
هەروەها لە دەسپێکی بۆنەکانی نەورۆز ژینگەپارێزان وشیارکردنەوەی خەڵک بە مەبەستی پاراستنی ژینگە دەور و رۆڵی بەرچاویان گێڕا، لە ساز کردنی کەمپینی” نا بۆ تەق وتۆق” و ئاگرنەدانی لاستیک لە ئاگری نەورۆز تا کەمپینی سێزدەبەدەری خاوێن. کە چەند رۆژێکە دەستی بە کارەکانی خۆی کردوەو کۆمەلێک لە ژینگەپارێزانی کوردستانی خوازیاری ئەوەن کە خەڵک لە رۆژی سێزدەبەدەر ئاگادار بن کە زیان بە سروشت و ژینگەی نیشتمان نەگەێنن و رێز لە جوانی بەهار کوردەواری بگرن.