لە بەرەبەری هەفتاد ساڵەی لە سێدارەدانی سەرۆککۆمار پێشەوا قازی محەممەد، کە بە رۆژی شەهیدانی کوردستان ناوزەد کراوە ، دەفتەری سیاسیی حیزبی دیموکراتی کوردستان بەو بۆنەیەوە نامەیەکی بۆ سەرجەم بنەماڵەی سەربەرزی شەهیدان ناردو رێزی لە فیداکاریی و خۆڕاگری بنەماڵەی شەهیدان گرت.
شەهیدان کە سامانی سەرکەوتنی گەلانی بن دەست وتێکۆشەرن، بێ گومان بنەماڵەنیان وەک یادگاری بە جێماو لە ئەوان و نموونەی زیندووی فیداکارین کە رێزی تایبەتیان هەیەو دەبێ تاک بەتاکی کۆمەڵگە بەرانبەر بەو بنەماڵانە سەری حورمەت و رێز دانوێنن.
خەباتی مافخوازانەی گەلی کورد لە رۆژ هەڵاتی کوردستان بە شێکی زۆری بە خوێنی شەهیدان و فرمیسکی بنەماڵەکانیان تا ئەمرۆگەیشتووەو هەربۆیە ئەرکێکی پیرۆز و شیاوە یادکردن لە شەهیدان و رێز گرتن لە بنەماڵەکانیان.
هەر بەم مەبەستە دەفتەری سیاسیی حیزب، بە ناردنی نامەیەک سڵاو ورێزی بێکۆتای پێشکەش بە سەرجەم ئەو بنەماڵانە کردوە کە خەمی بەژانی لەدەستدانی ئازیزانیان لە ناخ دایەو، بەڵام سەفەرازانە باشترین پاداش بۆ شەهیدان ، درێژە دان بە ڕێگەی شەهیدان دەزانن.
لە بەشێک لە نامەی دەفتەری سیاسیدا هاتووە: هەرکام لە ئێوەبنەماڵەکانی شەهیدان لە پێناوی رزگاریی نەتەوەکەتان و بەرەوپێشچوونی خەباتی نەتەوەیی و ئازادیخوازیی حیزبی دیموکراتی کوردستاندا، ئەندامێک و هێندێکتان زیاتر لە ئەندامێکی خۆشەویست وبەنرخی بنەماڵەکەتان لە دەست داوە، دەزانین رەنج و مەینەتی ئێوە هاوسەرانی شەهیدەکان و ئەرکی قورسی سەرشانتان لە سەرپەرەستی و پێگەیاندنی جگەرگۆشەکانتان، بەرهەمی ژیانی هاوبەشی خۆتان وهاوسەری شەهیدتاندا لە گوتن نایە، خوزیا و تاسەی منداڵانی ناز لێشێواوتان و بێبەشیەکانیان و کۆسپەکانی سەرڕێی ژیانانتان بەتایبەتی لە وڵاتێکدا کە دوژمن بەسەری زاڵە لە ئێمەمانان شاراوە نیە.
لە درێژەی نامەی دەفتەری سیاسیی حیزبی دیموکراتی کوردستاندا کە پێشکەشی بە بنەماڵەی شەهیدان کردوە، وێڕای بەرزنرخاندنی جێگەوپێگەی بنەماڵەی شەهیدان لە ئێستاکەی خەباتی مافخوازانەی گەلەکەمان، هەروەها خەمخۆرییان بۆ داهاتوویەکی گەش رێزو سپاسی شۆڕشگێڕانەی بوویان ناردوە.
لەو نامەیەدا هاتوە: رێگەمان بدەن بەم نامەیە لە ئاست گەورەیی و بەخشەندەییتان و وەکوو رێزگرتن لەهەموو بێبەشی و مەینەت و رەنجەکانتان ،کە لە پێناوی خەباتی مافخوازنەی حیزبی دیموکراتی کوردستاندا لە خۆتان گرتوە، بەرامبەر سەربەرزی ئێوەو گیانی پاکی شەهیدان سەری رێز دانەوێنین. ئێمە لەوە بەداخین کە حیزبەکەتان بە هۆی هەلومەرجی تایبەتیی خەبات نەیتوانیوە بەوشێوە کە شیاوی ئێوەیە ئاورتان لێ بداتەوە و پێتان ڕابگا.
لە کۆتایی ئەونامەیەدا هاتووە کە بەردەوامیی حیزبی دیموکراتی کوردستان لە تێکۆشان و پاڵپشتی سەرجەم خەڵکی کوردستان بە تایبەتی بنەماڵەی خۆڕاگریی شەهیدان گەرانتی لە ناوبردنی داگیرکەران و، سەرخستن و سەربەستی گەلی کورد لە رۆژهەڵاتی کوردستان دەستەبەر دەکا.