حەسەن روحانی سەرۆککۆماری ئێران کە رۆژی ٥ی خاکەلێوە بۆ ماوەی یەکرۆژ سەردانی پارێزگای سنەی کرد و مەبەست لەو سەردانە گوایە کردنەوەی چەندین پرۆژەی ئاوەدانکاری بڵاوبۆوەتەوە، بەڵام بە هەڵسەنگاندنی مەودای نێوانی دوو جار سەردان کردنی حەسەن روحانی لە پارێزگای سنە لە ماوە سەرۆککۆماریەتیدا، بۆمان دەردەکەوێ کە بێجگە کەڵەکە کردنی کۆمەڵێک وادە و بەڵێنی هیچ کام لە کێشە ئابووریی و سیاسی وفەرهەنگییەکانی خەڵکی کورد لە پارێزگای سنە چارەسەر نەبووە و، تەنانەت بە پێی هەواڵی ناوەندە حکومییەکان هەڵاوسان و نرخی بێکاری لە سەردەمی دەسەڵاتداریەتی حەسەن روحانی بەرز بووتەوە.
لە بواری سیاسی و فەرهەنگیشدا سەرەڕای وادەو بەڵێنیەکانی سەرۆكکۆمار تەنانەت دابینکردنی ناوەند و ڕاوێژکارێک بۆ پەڕژاندن بە سەر پرسی کەمە ئاینیی و نەتەوەکانی دیکە لە ئێران، نە تەنیا هەنگاوێکی جیددی بۆ چارەسەریی کێشەکان هەڵنەهێناوە، بەڵکوو ناوەندە ئەمنییەکان لە کوردستان بە گشتی و لە پارێزگای سنە دەسەڵاتی باڵایان هەیە.
جێبەجێی نەبوونی پرسی نەتەوەیی وەکوو خوێندن بە زمانی دایک، کە چەند جار روحانی بە ڕاشکاوی وادەی دابوو، یەکێک دیکە لە دروشمە بریقەدارەکانی سەرۆککۆمارە کە وەک خۆی ماوەتەوە
چاوەدێڕانی سیاسی سەردانە یەکرۆژەکەی حەسەن روحانی لە پارێزگای سنە بۆ هەڵبژاردنەکانی سەرۆكکۆماری و شووڕای گوندو شارەکان دەگەڕێنەوە، بەتایبەتی ئەوەی کە ئەگەر روحانی لە هەڵبژاردنەکانی داهاتووشدا، ڕەکەبەرێکی بەهێزشی نەبێ، بەهۆی ئەوەی دەوڵەتەکەی لە زۆر بواردا ناسەرکەوتوو بووە، رێژەی دەنگەکانی دێتە خوارەوە.
شایانی باسە سەرەڕای ئاگادارکردنەوەی پێشتری ٥چالاک و رۆژنامەنووسی کورد بەناوەکانی؛ ئیجلال قەوامی،موختارزارعی،ئازاد نمەکی و سەیید هاشم حیسامی بۆ بەشداریی کردنیان لە دانیشتنی نێوان سەرۆکۆمار و چالاکانی سیاسی ومەدەنیی پارێزگای سنە سەبارەت بە هەڵبژاردنەکان و، کۆمەلێک پرسی دیکە ،بەڵام هێزە ئەمنییەکان رێگەیان نەدا ئەو ٥ چالاک و رۆژنامەنووسە لەو کۆبوونەوەدا بەشدار بن.