رێورەسمی نەوورۆزی ئەمساڵ بە شێوەیەکی بەربڵاو و کەموێنە لە زۆربەی شارو ناوچەکانی کوردستان بەڕێوەچوو.
خەڵکی رۆژهەڵاتی کوردستان وەکوو نەریتێکی مێژوویی پێشوازییان لە هاتنی بەهار کرد و بە دەور ئاگری نەورۆز ، بە هەڵپەرکێی و گۆڤەند گێڕان ساڵی تازەیان دەستپێکرد.
جیاوازی بۆنەکانی نەورۆزی ئەمساڵ لە گەڵ ساڵانی پێشوو لەوە دابوو، کە جیا لە هەبوونی روحی یەکریزی و پێکەوەبوونی خەڵکی کورد لە شار و شارەدێی و گوندەکان و بەڕێوەبردنی نەورۆزێکی بەشکۆ، لە مل کردنی جامانە وەک ڕەمزی هاوبەش لە نێوان جلوبەرگی کەلتوریی و خەباتکارانی کورد، نەورۆزێکی تایبەت وجیاواز بوو
لە نەورۆزی ئەمساڵدا ، چڕین و خوێندنی گورانی و هەڵبەستی شۆڕشگێرانە، بەشداریی خەڵک لە هەموو چین وتوێژەکانی کۆمەڵگە لە ڕێورەسمەکانی ئەمساڵ باسی لەوە دەکرد کە خەڵکی رۆژهەڵاتی کوردستان خاوەنداریەتی خەبات وشۆرشی مافخوازنە خۆی دەکا .
ئەگەرچی لە دوایین رۆژەکانی زستان جموجۆڵی ناوەندە ئەمنییەکان بە مەبەستی کونترۆڵ کردنی کەش وهەوای پێشوازیی کردنی خەڵک لە نەورۆز زیادی کردبوو،تەنانەت لە چەند شوێن وەکوو ساین قەڵاو تورجان و سەرشێو رێگەیان نەدا کە خەڵک بە شێوەی بەربڵاو بەشداریی لە رێورەسمی نەورۆز بکەن.
بەڵام هاوتەریبی چالاکانی مەدەنی و سیاسی و پشتیوانی کردنی ڕێکخراوە نەتەوەیی و شووناسخوازەکان لە سەر بۆنەی مێژووی نەورۆز وەکوو بەستێنێک بۆ بوژانەوە بۆ بە هۆی ئەوەی کە خەڵک بە گەرمیی وبە هیوادارییەوە لە بەشەکانی دیکە رۆژهەڵاتی کوردستان بە هاوشانی و پێکەوەبوون یادی نەورۆز بکەنەوە.
هەواڵەکان و بڵاوبوونەوەی فیلم و وێنەکانی نەورۆز ئەمساڵ باس لەوەدەکەن کە ژنان و کچانی چاونەترسی کورد ئەمساڵ بەرچاوتر لە جاران شان بەشانی براوکەسوکارەکانیان هاتنە سەرشەقام و گەشاوەتر لە ئاگری نەورۆز، یەکەم ساتەکانی بەهارییان بە ئومێدی دوارۆژێکی پرشنگدار ڕازاندەوە.
بە پێی هەواڵی گەیشتوو بە کوردستان وکورد ناوەندەئەمنییەکان کە گڕوتینی خەڵکیان بینی و بۆ بەڕێوەبردنی نەورۆزی ئەمساڵ بۆ خۆیان نەیانتوانی رووبەروو ویست وئیرادەی خەڵک ببنەوە، هەربۆیە لە هێندێک ناوچە بە وتاربێژانی رۆژی هەینییان ڕاسپاردبوو، کە بە دژی ئاگر و رێورەسمی نەورۆز بانگەشە بکەن و خەڵک دڵسارد بکەن لە بەشداریی کردنیان لە رێورەسمی نەورۆز، بەڵام ئەو هەوڵەش بە ئاکامی خۆی نەگەیشت و، خەڵکی رۆژهەڵاتی کوردستان هەم ئاگری نەورۆزییان کردەوە هەم جامانەیان لە گەردەنی نەورۆز ئاڵاند.
زانیارییەکان باس لەوە دەکەن لە خوارو ژووری رۆژهەڵاتی کوردستان ، خەڵکی کورد بەیەکریزی و یەکگروتووییەوە ، بە هەڵکردنی ئاگرو پۆشینی جلوبەرگی کوردی و لە مل کردنی جامانە، پەیامی خۆیانیان هەم بە دوژمنان و نەیارانی کورد هەم بە دۆستان و خەمخۆرانی گەل وخاک گەیاند و نەورۆزی ئەمساڵیان کردە نەورۆزی یەکگرتن و پێکەوە بوون.
