خەڵکی رۆژهەڵاتی کوردستان کە چەند ساڵێکە بەشێوەیەکی بەربڵاو و بە شکۆی تای٧بەتەوە بەشداریی لە بۆنەکانی نەورۆز دەکەن، ئەمساڵ بە پیشنیاری رێکخراوە سیاسی و مەدەنیەکانی کوردستان ، بە نیازن نەورۆزی ئەمساڵ بە شێوەی یەکگرتووانە بەڕێوە ببەن.
بە پێی زانیارییەکان کە لە تۆرە کۆمەڵایەتییەکان بڵاو بۆتەوە، چین وتوێژەکانی کوردستان بە رێکخستنی کەمپەین و ئاڵۆگۆڕ کردنی بیروڕا خوازیاری ئەوەن کە ڕێورەسمەکانی نەورۆزی ئەمساڵ خاوەنی رەنگ و بۆنێکی یەکسانخوازی و هەڵگری دەنگی یەکریزی بێ.
هەر لەو پێوەندییەدا بەشێکی بەرچاو لە چالاکانی مەدەنی نیو خۆی وڵات بە بڵاوکردنەوەی پەیامێک داوایان لەسەرجەمی خەڵکی کوردستان کردوە کە نەورۆز بکەن بە هەوینی هاوشانی ویەکریزی و بەیکگرتوویەوە پێشوازی لێی بکەن و بەڕێوەی ببەن.
هەروەها نزیک بە مانگێک دەبێ کە کەمپەینێک لە ژێرناوی “نا بۆ تەق وتۆق، بە مەبەستی بەڕێوەبردنی نەورۆزێکی نەتەوەیی و مەدەنیانەو، بە دوور لە کارەسات و ڕووداوی ناخۆش پێکهاتووە.
لە درێژەی بانگەشە کردن بۆ بەشداریی کردنی خەڵکی کوردستان لە بۆنەکانی تایبەت بە نەورۆز، لە لایەن حیزبە نەتەوەییەکانەوە پیشنیار کراوە کە “جامانە” وەک سیمبۆلی هاوبەش لە نێوان خەباتکاران و تێكۆشەران بکرێتە هێمای ئەمساڵی نەورۆز کە لە ئێستاوە خەڵکی کوردستان بە بڵاو کردنەوەی وێنەی خۆیان بە جامانەو ئاغابانوو، لەو پێشنیارە پێشوازییان کردوە.
خەڵکی رۆژهەڵاتی کوردستان چەندین ساڵە بەگەرمو گۆڕتر رێورەسمەکانی نەورۆزیان کردوتە هەوینی شووناسخوازی و بەستێنی سەرهەڵدان و بیانوویەک بۆ خۆ دەربڕینی ویست وخواستی نەتەوەیی.
ئەگەری ئەوە هەیە ئەمساڵ بەشێوە بەرفراوان لەهەموو ناوچە جیاجیاکانی کوردستان ئاگری سوور و زەردی رووسووری نەتەوەیەکی چەوساوە، بەڵام هەردەم زیندوو، هەڵکرێ و لە گوندو شارەکان ،ئاوازی “ئەمرۆژی ساڵی تازەیە نەورۆزە هاتەوە، دەنگ بداتەوە.
