کۆمەڵێکی بەرچاو لە چالاکانی مەدەنیی لە رۆژهەڵاتی کوردستان داوا لە سەرجەم خەڵکی رۆژهەڵاتی کوردستان دەکەن کە وێڕای پۆشینی جل و بەرگی کوردی، بە بەکارهێنانی جامانە(ئاغابانوو) لە رێورەسمە نەورۆزییەکانی ئەمساڵدا، نەرۆزی ئەمساڵ بکەنە “نەورۆزی جامانەکان”.
چالاکانی مەدەنی ناوخۆی رۆژهەڵاتی کوردستان پێیان وایە لە چەند ساڵی رابردوودا رێورەسمی نەورۆزییەکانی لە رۆژهەڵاتی کوردستان بە چەشنێکی جیاواتر لە ساڵانی پێشتر بەڕێوە دەچن و خەڵک لەم دەرفەتەدا بۆ گەیاندنی دەنگی مافخوازانە و ئاشتیخوازانەبوونی ویستەکانی و هەروەها هەوڵدان بۆ پاراستنی شوناسی کلتووری و زمانیی خۆیان لە دەوری یەک کۆدەبنەوەو میتینگ و کارنەڤاڵی هەزاران کەسی بەڕێوە دەبەن.
چالاکانی مەدەنی لە زۆربەی شارو ناوچەکانی رۆژهەڵاتی کوردستان بە وەرێخستنی هەڵمەتێکی مەدەنیانە لە ژێر ناوی “نەورۆزی جامانەکان” لە توڕە کۆمەڵایەتییەکاندا داوای لە بەشداربووانی رێورەسمە نەورۆزییەکانی ئەمساڵ دەکەن کە بۆ دەربڕینی پەیامی یەکریزی و هاودەنگیی و یەکبوونی کۆمەڵگای رۆژهەڵاتی کوردستان، وێڕای پۆشینی جلوبەرگی رەنگاورەنگی ، لە جامانە(ئاغابانوو) کەڵک وەربگرن و وەک هێمایەکی گشتیی نەتەوەیی بۆ یەکریزی و یەکبوون بەکاری بێنن.
چالاکانی مەدەنی لە رۆژهەڵاتی کوردستان پێیان وایە بۆیە جەمانەیان بۆ ئەم مەبەستە دیاری کردوە، چونکی هێمایەکی گشتگیری جەماوەرییەو تایبەت بە هیچ لایەنێکی دیاریکراو نیەو خەڵکی کوردستان بە گشتی بە ژن و پیاوەوە بەکاری دەهێنن.
هاوکات و هەر لەم پێوەندییەدا زۆربەی حیزب و لایەنە سیاسییەکانی رۆژهەڵاتی کوردستانیش داوا لە خەڵک دەکەن کە نەورۆز بکەنەوە بە بۆنەیەک بۆ سەلماندنەوەی خۆشەویستیان بۆ نیشتمانو نەتەوەکەیان، بۆ بە هێزکردنەوەی تەبایی و یەکگرتوویی ڕیزەکانیان، بۆ نوێکردنەوەی بڕیارو ئیرادەیان لە درێژەدانی خەبات دژی ستەمو زۆرداری، بۆ نیشاندانەوەی لێبڕاویان لە گەڵ هەموو ئەو دیاردەو ڕووداوانەی هەڕەشە لە سڵامەتی نیشتمانی خۆشەویستیانو دانیشتوانی دەکەن.
