سکرتێری گشتیی حیزبی دێموکراتی کوردستان لە وتووێژێکدا لە گەڵ ماڵپەڕی ئاژانس کۆمەڵێک پرس و بابەتی پێوەندیداری بە هەلومەرجی سیاسی ئێران و دۆخی ئێستاکەی حیزبی دێموکراتی خستەڕوو.
مستەفا مەلوودی سکرتێری گشتیی حدک، لە وڵامی پرسیارێک لە پێوەندی لەگەڵ پرسی یەکگرتنەوەی دێموکراتەکاندا دەڵێ: بەربەستمان بۆ یەكگرتنەوە لە ئێستادا شێوازی تێڕوانینمانە بۆ خەبات و ئاییندەی كورد لە ڕۆژهەڵاتی كوردستانە.״ هەروەها لەو پێوەندییەدا گوتی:
حێزبی دیموكراتی كوردستانی ئێران ״حدكا״ كۆبوونەوەكانی لەگەڵ ئەواندا ڕاگرتووە بۆ گفتوگۆی یەكگرتنەوە .
سکرتێری گشتیی حیزبی دێموکراتی کوردستان وەکوو ڕاونینی خۆی سەبارەت بە یەکگرتنەوەی هەردوو باڵی دێموکراتەکان گوتی: پرسی یەكگرتنەوەی دێموكراتەكان جددییە و لە ماوەی ئەو دە ساڵەدا كە دابڕان لە ڕیزەكانی حزبی دیموكراتدا ڕووی داوە هەمیشە گرنگیی خۆی هەبووە و كاری لەسەر كراوە. ئێمە چوار ساڵ پێش ئێستاش ئەو پرسەمان لەگەڵ یەكتر باس كردووە و تەنانەت پڕۆژەیەكی نووسراویشیمان داوەتە هاوڕێیانمان لە حدكا كە چۆن هەردوو لایەنی حیزبی دیموكرات یەك بخەینەوە، دیارە پێشتر لێژنەیەكمان هەبوو بۆ یەكگرتنەوەی هەردوو لایەنی حزبی دیموكرات كە من سەرۆكی لێژنەكەی حزبی دیموكراتی كوردستان بووم و بیروبۆچوونەكانی من لەنێو ئەو پڕۆژەیەدا هەیە.
مستەفا مەولووودی لە درێژەی وتووێژکەیدا لە گەڵ ماڵپەڕی ئاژانس بە ئاماژەدان بە هەوڵ وماندووبوونی خالید عزیزی سکرتێری پێشووی حدک بۆ چارەسەری پرسی یەکگرتنەوەی دێموکراتەکان ڕایگەیاند؛
ئەو پڕۆسەیە كە لەگەڵ كاك خالید دەستمان پێ كردووە باش چووەتە پێشەوە، پێوەندی هەردوولایەن لەگەڵ یەک ئاسایی بووتەوە و دوو لێژنەش لە هەردوولا ساز کراوە بۆ گفتگۆ کردن لەسەر پرسی یەکگرتنەوە ، ئەگەرچی ماوەی ساڵێكە هاوڕێیانمان لە حیزبی دیموكراتی كوردستانی ئێران ڕەوتی وتووێژەكانیان ڕاگرتووە. دیارە ئەمن هەوڵ دەدەم ئەو وتووێژ و دانیشتنانە دەست پێ بكەنەوە تا بە یەكەوە خاڵە هاوبەشەكان بدۆزینەوە و كاریان لەسەر بكەین لە پێناو یەكگرتنەوەدا.
سکرتێری گشتیی حدک هۆکاری ڕاگرتنی گفتگۆکانی بۆ خوێندنەوەی سیاسی و شێوازی خەباتی هەر دوو لا گەڕاندەوە و لەو بارەوە گوتی؛
ئێمە خوێندنەوەمان بۆ چۆنیەتیی بەشداریی خەڵكی ڕۆژهەڵاتی كوردستان لە بزاوتی سیاسی و كۆمەڵایەتی و مەدەنی فرەڕەهەندییە و بە بایەخێكی زۆرەوە بۆ جۆری خەبات و چالاكیی مەدەنی لە ڕۆژهەڵاتی كوردستان دەڕوانین كە بەشێكی سەرەكییە لە خەباتی كورد، كەچی ئەوان پێیان وایە ئەم جۆرە خەباتە كەمڕەنگكردنەوەی خەباتی سیاسیی پێشمەرگانەیە، بەڵام ئەمن پێم وایە ئەم خوێندنەوەیەی ئەوان دەقیق و لە جێی خۆیدا نییە، چونكە مێژووی خەباتی حزبی دیموكرات بایەخی تایبەتیی داوە بە هەردوو ڕەهەند و جۆری خەباتەكە.
هاوڕێ مستەفا مەولوودی لە بەشێکی دیکە لە وتووێژەکەیدا سەبارەت بە هۆکاری تەقینەوەکانی بەردەم قەڵا لەو پێوەندییەدا گوتی؛ بەهۆی هەبوونی بەڵگەکان گومانمان لەوەدا نەماوە ئەو کردەوە تیرۆریستییە کاری کۆماری ئیسلامیی ئیران بووەو ،ئێران هەمیشە بە دوای ئەوەوە بووە كە زەبر لە هێزە كوردییەكان بدا و لە هەمان كاتدا دەیەوێ بڵێ هەرێمی كوردستان ئەو ئەمنییەت و ئاسایشەی پێی دەنازێ ئەو ئاسایش و ئەمنییەتە نییە. هەروەها دەیویست بە درووستكردنی بەدگومانی لە یەكتری ڕەوتی ئەو دانیشتن و وتووێژانەش كە لەگەڵ حزبی دیموكراتی كوردستانی ئێران بوومانە لە باری ببا و وا بنوێنێ كە ئەم تەقینەوەیە لە دژی یەكتر كراوە.
