بە پێی هەواڵی گەیشتوو لە نێو خۆی وڵات ، زەینەب مەمەندی خەڵکی ماماڵی بانە دایکی شەهید جەماڵی ئەمینی، لە تەمەنی ٧٥ ساڵەییدا ماڵاوایی لە ژیان کرد.
خاتوو زەینەب وەکوو هەموو دایکێکی جەرگ سووتاو هەتا دوا چرکەی ژیان بە داخی گرانی رۆڵەی شەهیدکراوی ژیاو بەو داخەوە سەری نایەوە.
خاتوو زەینەب دایکی شەهید جەماڵ ئەمینی دوای بەسەر بردنی تەمەنێکی روو سوورانە بە هۆی سەکتەوە، دڵێ لە لێدان کەوت و بە بەشداریی بەرچاوی خەڵکی ئەمەگناسی بانە، لەوپەڕی رێزەوە لە گۆڕستانی سڵێمانبەگی ئەو شارە ئەسپەردەی خاک کرا.
شایانی باسە شەهید جەماڵ ئەمینی پێشمەرگەی حیزبی دێموکرات لە شەرو تێکهەڵچوونێک لە نێوان خەباتکارانی دێموکرات و هێزە سەرکوتکەرەکانی رێژیم رووی دا، لە ناوچەی قەرەکەند لەساڵی ١٣٦٢ی هەتاویی گیانی پێشکەش بە خاکی نیشتمان دەکا و، دەچێتە ریزی نەمرانەوە.
کۆمیسیۆنی راگەیاندنی حیزبی دێموکراتی کوردستان وێڕای پێشکەش کردنی پرسەو سەرەخۆشی لە بنەماڵەی سەرفەرازی شەهید جەماڵ و خاتوو زەینەب و سەرجەم خەڵکی شاری بانە، خۆی بە شەریکی خەمیان دەزانێ.