وتەبێژی وەزارەتی دەرەوەی ئامریكا جەختی كردۆتەوە: هەڵوەشاندنەوەی گەمارۆكان بەدژی ئێران قۆناغ بە قۆناغ‌و ئەویش پاش دڵنیا بوون لە جێبەجی كردنی بەڵێنییەكان لە لایەن ئەم وڵاتەوە دەبێ.
بەپێی قسەكانی ماری هارف وتەبێژی وەزارەتی دەرەوەی ئامریكا، هیچ گۆڕانكارییەك لە هەڵوێستی ئامریكا لە بابەت هەڵوەشاندنەوەی كاتی و قۆناغ بە قۆناغی گەمارۆكان لە ڕێككەوتنێكی ناوكیی گشتگیردا پێك نەهاتووە.
وتەبێژی وەزارەتی دەرەوەی ئامریكا پێداگری كردووە كە، تەنیا پاش ئەوەی دڵنیا بین ئێران لە پێناو بەرتەسك كردنەوەی بەرنامەی ناوكیی خۆیدا هەنگاو دەنێ، گەمارۆكانی لەسەر كەم دەكرێتەوە.
ناوبراو پشتڕاستی كردۆتەوە: ئەم ڕێككەوتنە سیاسییە، كەم كردنەوە، هەڵپەساردن یان هەڵوەشاندنەوەی خێرای گەمارۆكانی لێ ناكەوێتەوە.
جێی باسە قسەكانی ماری هارف سەبارەت بە هەڵوەشاندنەوەی گەمارۆكان لە حاڵێكدایە كە كاربەدەستانی ئێران جەخت لەسەر پێویستیی هەڵوەشاندنەوەی تەواوو دەستبەجێی گەمارۆكان لە ڕۆژی یەكەمی جێبەجی كرانی ڕێككەوتنامەی ناوكی دەكەنەوە.
