دەنگدانەوەی میدیایی و هاوهەڵویستی چین وتوێژەکانی کوردستان سەبارەت بە کارەساتی دڵتەزێنی گیانلەدەستدانی کۆڵبەرانی ناوچەی سەردەشت، کاربەدەستانی رێژیمی ناچار کرد کە وە دەنگ بێن.
محەممەد جەعفەر مونتەزێری دادستانی گشتیی وڵات رایگەیاند؛ بەداخەوە سەرەڕای چەخت کردنی رێبەری نیزام سەبارەت بە شیوی هەڵسوکەوت کردن لە گەڵ کۆڵبەران دیسانەکە هەواڵەکان باس لە تاڵان کردنی کەلوپەلی کۆڵبەران دەکەن.
کۆڵبەرانی ناوچە سنوورییەکان کە تەنیا رێگەی دابینکردنی ژیانیان کۆڵبەرییە نابێ سووکایەتیان پێ بکرێ.
دادستانی گشتیی ولات وێرای بەداخبوونی لە گیان لەدەست دانی چەند کۆڵبەڕ ئاواتی خواست کە لە زۆترین کات دۆخی ئابووری گەشە بکات و چیتر شاهیدی وەها رووداگەلێک نەبین
هەروەها جێگری سیاسی، ئەمنیەتی وکۆمەڵایەتی پارێزگاری سنە بە باس کردن لە پرسی کۆلبەری و گرفتەکانی سەررێی کۆڵبەران، گوتی؛ بە کار هێنانی ناوی قاچاخچی لە جیاتی کۆڵبەر کە هیندیک کەس باسی دەکەن نارەوایە و لەوبارەوە رایگەیاند؛ تەنانەت دەبێ لە جیاتی وشەی کۆڵبەر ،لە وشەی پیلەوەر و بازەرگان کەڵک وەربگرین ، چونکە یاسای وڵات ئیزنی داوە کە کەلوپەل لە دیو سنوورەکانەوە ئادیوی ئەم دیو بکەن.
عەلیرەزا ئاشناگەر جیگری پاریزگاری سنە رایگەیاند؛ بڕیارە رێگەی هاتوچۆ کردنی کۆڵبەران هەمووارتر بکرێ و، تەنانەت کەلوپەلەکانیان بە کۆڵ هەڵنەگرن بەڵکوو بە داشقەو ئیمکاناتی دیکە بگوازنەوە.
شایانی باسە شەپۆلی بەربەرینی هاوخەمیی کردن و پەرۆش بوونی خەڵکی کورد سەبارەت بە کۆڵبەران کە چەندین ساڵە بە شێوازی جۆراجۆر گیانیان لە دەست دەدەن ، بۆ بە هۆی وەدەنگ هاتنی بەرپرسانی نیزام ، کە چیتر لەو بارەوە کەمتەرخەم نەبن و ریگە چارەی شیاو بگرەنە پێش نەک تەقەکردن و ڕاودۆنانی چینی کاسبکاری کۆڵبەر.
کارناسانی سیاسی ململانێی مافیای سپای پاسداران و دەوڵەت بە هۆکاری سەرەکیی جێبەجێ نەبوونی بریارەکانی دەوڵەت دەزانن، چونکە سپای پاسداران بۆ درێژەدان بە تەڕاتینی ئابووری خۆی، پێویستی بە کەشی ئەمنیەتی هەیە.