بەدەسپێشخەری شاخەوانان و چالاکانی مەدەنی ناوچەی مەهاباد و بە ئامادەبوونی خەڵکێکی زۆر لە گوندی کەرێزەشێخان مێهرەجانی “بەیڵندانا”
بەڕێوەچوو.
بەیڵندانا جێژنێکی کۆن و ئەفسانەیی ناوچەی مەهابادە کە هەموو ساڵێک لە رۆژانی ١٤ و ١٥ی رێبەندان کە بە پێی رۆژمێرە کۆنەکان سروشت لەباری کەشوهەوا، ئاڵوگۆڕی بەسەردێ و زەوی گەرم دەبێ، هەربۆیە لە مێژە خەڵکی ئەو ناوچە لەوەها رۆژانێک بە بەرێوەبردنی رێورەسمێکی تایبەت و ڕازاوە، ئەو یادە سمبۆلیکە دەکەنەوە.
مەبەستی سەرەکیی لەو مێهرەجانە شوکرانە بژێری و سەخاوەتمەندبوونە هەربۆیە خەڵک لە رێورەسمەدا یاریدەدەری یەکترن و، شان بەشانی یەکدی ئەو ڕێورەسمە بە رێوەدەبن
ئەمساڵیش لە رۆژی ١٥ی رێبەندان خەلکی ناوچەی مەهاباد بە ئامادەبوونیان لە گوندی کەرێزەیشێخان، بە شیوەیەکی تەواو فۆلکلۆریک ئەو مێهرەجانەیان بەڕێوەبرد.
کردنەوەی ئاگر، هەڵپەرکێی کردن بەدەوری ئاگرو سوارکاریی لە تایبەتمەندییەکانی ئەو بۆنەیە کە هەمووی دەگەڕێتەوە بۆ داب ونەریتی کۆنی کوردەواری لە ناوچەی مەهاباد.
شایانی باسە چەند ساڵێکە بە هەوڵ وهیمەتی چالاکانی مەدەنی و فەرهەنگی لە گوند و شارە جیاجیاکانی کوردستان بەشیوەیەکی بەربڵاو یاد وبۆنە نیشتمانییەکان دەکرێتەوەو، بەستێنیکە بۆ کوردایەتی کردن و زیندوو هێشتنەوەی شووناسی نەتەوەیی.