ڕێوڕەسمی پیرشالیار بە بەشداری هەزاران هاووڵاتیی کورد لە ماوەی چەند ڕۆژی ڕابردوودا له شاری هەوارامان دەستی پێکرد.
بەپێی هەواڵی سەرچاوە نێوخۆییەکان، ئەمساڵ ڕێوڕەسمی پیرشالیار بە بەشداریی هەزاران کەس لەژێر بارینی بەفر و سەرما بەڕێوەچوو.
ڕێوڕەسمی کۆنی پیرشالیار لەلایەن خەڵکی ئەو ناوچەیە بە”زەماوەندی پیرشالیار” بەناوبانگە و هەموو ساڵێ لە وەرزی زستان و لە نیوەی مانگی ڕێبەندان و هەروەها درێژەی ئەو ڕێوڕەسمە لە وەرزی بەهار لە ١٨ی بانەمەڕ بەڕێوە دەچێ.
بەپێی بەڵگەی سەرچاوە مێژووییەكان پیرشالیار پیرێكی ڕۆحانی و خواناس و یەكێک لە موغانی سەردەمی زەردەشت بووە و لە لای خەڵكی هەورامان ڕێزێكی زۆری لێدەگیرێ و كتێبەكەی پیشانی كەسانی بێگانە نادەن و هەرەوها وتەكانی لەباتی مەتەڵ بەكار دەهێنرێ.
لەو ڕێوڕەسمەدا دەروێشەكانی ئەو ناوچەیە زیكر دەكەن و هەروەها لێنانی چێشتی تشین، دەفژەنی و سەمای عیرفانی و تەواف كردن و خوێندنەوەی شێعر و پەخشانی عێرفانیـ ئاینیی بەشێكی دیكە لە بڕگەكانی ڕێوڕەسمەكەن.
ڕێوڕەسمی”زەماوەندی پیر” هەر لە سەردەمانی زۆر دوورەوە لە گوندی هەورامانی تەخت بە بۆنەی ساڵڕۆژی زەماوەندی پیرشالیار بۆ ماوەی سێ ڕۆژ بەڕێوە دەچێ.
شایانی باسە لە ماوەی ئەو سێ ڕۆژەدا كە ئەو ڕێوڕسمە بەڕێوە دەچێ، نەریت و دابە مەزهەبییەكانی “كڵاو ڕۆچنە، قوربانی كردنی مەڕ و بزن، لێنانی چێشتی تشین، دەف ژەنی و سەمای عیرفانی و تەواف كردنی كەوشی پێستەی پیرشالیار” لەناو بەشدار بوان بەڕێوە دەچێ.
