لە کاتێکدا بە پێی گەلاڵەی دارێژراوی مێهرەجانی نیونەتەوەیی گەلان لە کرماشان بڕیار بوو رۆژی شەممە ٢ی رێبەندان گرووپی موسیقی دایراک خاتوون کۆنسێرتێک بەڕیوە ببا ، بەڵام بە بیانووی هەبوونی ژەنیار و گۆڕانیبێژی ژن، رێگەیان پێنەدرا لەو مێهرەجانە بەشداری بکەن.
بە پێی ڕاپۆرتی تۆڕی مافی مرۆڤی کوردستان ، گرووپی موسیقی دایراک خاتوون چەند رۆژ پێشتر لە هوتیل پارسیانی کرماشان چالاکیی هونەرییان نواند بوو، کە هەڵویستی توندی ماڵپەڕی “مرساد” ماڵپەڕیک نزیک بە سپای پاسدارانی لێکەوتەوە
ماڵپەڕی مرساد سێبەری سپای پاسداران بە رەخنەگرتن و هێرش کردن بەسەر گرووپی هونەری دایراک خاتوون لەوبارەوە بەرپرسانی بە تاوانبار زانی و بەڕێوەچوونی کۆنسێرتی موسیقایی گرووپی دایراک خاتوون پێکهاتوون لە چەندین ژەنیارو گۆڕانیبێژی ژنی بە پێشێلکردنی ئیخلاق وئاکاری ئیسلامی لە قەڵەمدا .
سەرەچاوەیەک لەوبارەوە ڕایگەیاند کە بەرپرسانی مێهرەجانەکە بە بیانووی ئەمە کە چەند رۆژ لەمەوبەر گرووپی دایراک لە هوتیل پاراسیان بەرنامەی هونەریی بەڕێوەبردوە و ژنان لەوێدا گۆرانیان چرێوە و چون هەموو ئەندامانی ئەوگرووپە ژنن هەر بۆ بیانووە ڕیگەیان پێ نادەن لەو میێهرەجانە بەشدار بن
شایانی باسە گرووپی دایراک خاتوون لە چەندین ژنی تەمبوورژەن و گۆرانیچڕ پێکهاتوەو، لە ساڵانی پێشوو چەندین جار کۆنسێرتیان بەڕێوە بردوەو لە لایەن خەڵکەوە بە گەرمی پێشوازییان لێکراوە.
یەکەمین مێهرەجانی نێونەتەوەیی گەلان لە رۆژی ٣٠ی بەفرانبار هەتا ٣ی رێبەندان لە شاری کرماشان بەڕێوە دەچێ.
شیاوی باسە کۆماری ئیسلامی بەتایبەتی باڵی بناژۆخوازو لایەنە ئەمنییەکان لە درێژەی هێرشی بەربڵاو بۆ سەر کلتوور وفەرهەنگی گەلانی دیکە لە ئێران هەرچەشنە چالاکیی هونەری ژنان بە مەترسی بەسەر نیزام و ئاسایشی نیشتمانیی دەزانن.