سەعات١٠ی شەوی ٣٠ سەرماوەز لەسەر ١ی بەفرانباری ١٣٩٥، لە بنکەی ناوەندی حیزبی دیموكراتی كوردستان ٢ تەقینەوە روویاندا كە بەداخەوە لە ئەنجامی ئەو تەقینەوانە ٧ پێشمەرگەی حیزبی دیموكرات و كارمەندى ئاسایشی حكومەتی هەرێمی كوردستان شەهید بوون و زیاتر لە ١٥ كەسیش بریندار بوون.
بەپێی راگەیەندراوی سەرەتایی حیزبی دیموكراتی كوردستان، لێكۆڵینەوەكان لەسەر چۆنیەتی و بكەرانی ئەو رووداوە هێشتا كۆتایی پێ نەهاتووە و چاوەڕێی ئەنجامی لێكۆڵینەوەكان دەكرێ. بێگومان رووداوی لەو چەشنە بۆ جولانەوەی رزگاریخوازانەی گەلی كورد لە كوردستانی ئێران و بەتایبەتیش سازمانی خەباتی كوردستان مایەی داخ و نیگەرانیەو بە خەسارێكی گەورە دێتە ئەژمار.
بەپێی لێكدانەوە سەرەتاییەكان ئەو كردەوەیە بەرنامە بۆ دارێژراوەو هەروەها بە لەبەرچاوگرتنی مێتۆد و سیاسەتی چەندین سالەی ئاخوندان لە راست نەیارانی خۆی، وا وێ دەچێ ئەو رووداوە كردەوەیەكی تیرۆریستی بێ و لەلایەن رژێمی ئاخوندییەوە پیلاندارێژی و جێبەجێ كرابێ.
لەگەڵ ئەو راستیەش هەر وەك لە راگەیەندراوی١٦ی دیسامبری ٢٠١٦ی ناوەندی ئاسایش و دژەتیرۆری سازمانی خەبات دەردەكەوێ رژێم هەوڵەكانی بۆ كردەوە تیرۆریستیەكان بەرەوسەر بردووەو لە ماوەی مانگەكانی رابردوودا چەندین تۆر و كەسی سیخور لە ریزەكانی سازمانی خەبات ئاشكرابوون كە بۆ ئەنجامی دانی كردەوەی تیرۆریستی خۆیان خزاندبوویە ناو سازمانی خەبات.
ئەوەی جێگەی هەڵوەستەی بە پەلەیە، پێویستە سەرجەم لایەنە سیاسیەكان، بۆ پێكهێنانی ناوەندێكی هاوبەش بۆ رووبەرووبوونەوەی هەر جۆرە کردەوەی تیرۆریستی دەسەڵاتدارانی ئاخوندیی و كردەوەی لەم چەشنە پێكەوە هاوكاری بکەن.
سازمانی خەباتی كوردستانی ئێران پرسەو سەرەخۆشی خۆی بە حیزبی دیموكراتی كوردستان و بنەماڵەی شەهیدەكان رادەگەیەنێ و لە خوای گەورە داواكارە رۆحی ئەو شەهیدانە بەبەهەستی بەرین شادبێ و سێبووری كەس و كاریان بدات.
سازمانی خەباتی كوردستانی ئێران
كۆمیتەی ناوەندی
١ی بەفرانباری ١٣٩٥