لە سێیەمین رۆژی کارەساتی تێرۆریستی لە بەردەم بنکەی دەفتەری سیاسیی حیزبی دێموکراتی کوردستان و شەهید بوونی پۆلێک پێشمەرگە وکادری ئەو حیزبە، چ لە ئاستی کوردستان و چ لە ئاستی دەرەوە، حیزب دێموکراتی کوردستان لە گەڵ کۆمەلێکی بەرفراوان لە نامە و برووسکە و شەپۆلی هاوخەمیی و شەرمەزارکردنی کردەوە تێرۆریستیکەی بەر قەڵای دیموکرات رووبەروو بوەتەوە.
حیزب و لایەنە سیاسیەکان و کەسایەتییە بەرچاو و ناسراوەکانی کورد و غەیرە کوردیش لە سێیەمین رۆژی ئەو کردەوە نامرۆڤانەیە بە هەڵویست گرتن و هاوسۆزی دەربڕین وێڕای ئیدانە کردنی تێرۆر بە تایبەت تێرۆری نێو دەوڵەتی کە لە مێژە ساڵە رۆڵەکانی حیزبی دێموکراتی کوردستانی کردۆتە قوربانی و خەڵکی کوردی بە گشتیی داخدار کردووە ، خوازیاری لێکۆڵیینەوە و بە دواچوونی زیاتر بۆ بە ئەنجام گەیشتن و ناساندنی دەستوپێوەندییەکانی ئەو کردەوە تێرۆریستییەن.
بەشێکی بەرچاو لە کەسایەتییە سیاسییەکانی هەرێمی کوردستان بە ناردنی پەیام و دەرکردنی بەیاننامە یان سەردانی دەفتەری سیاسی حدک ، هاوکات لە گەڵ سەرەخۆشی کردن لە بنەماڵەی شەهیدانی شەوی یەڵدا، داوایان کردووە کە هێزە ئەمنییەکانی باشووری کوردستان هەموو هەوڵی خۆیان وەگەڕ بخەن بۆ دۆزینەوەی تاوانباران و بکەرانی ئەو ڕووداوە دڵتەزێنەو ڕایانگەیاندوە کە مادام حیزبی دێموکراتی کوردستان لە نێوانی تێرۆر و خەباتی ڕەوا و مافخوازانە سنووری داناوەو و هیچکات پەنای بۆ کردەوەی تێرۆریستی نەبردووە، ئەرکی سەرشانی هەموو لایەنی سیاسیەکان و ناوەندەکانی داکۆکیکاری مافی مرۆڤ لە کوردستان و دەروەوەی کوردستانە کە پاڵپشتی حیزبی دێموکرات بن و دەبێ هەر چەشنە کردەوەیەکی تێرۆریستیش مەحکووم بکەن.
د. یوسف محەممەد. سەرۆکی پاڕلمانی کوردستان لە پەیامە هەوخەمییەکەیدا روو بە کاک خالید عەزیزی سکرتێری حیزبی دیموکراتی کوردستان دەڵێ،
بەناوی خۆم و پەرلەمانی کوردستانەوە، پرسەو سەرەخۆشی لە جەنابتان و خانەوادەی شەهیدان و هەمو ئەندامان و لایەنگرانی حیزبەکەتان دەکەم. هیوادارین لایەنە پەیوەندارەکان، بە زووترین کات لێکۆڵینەوە لە روداوەکە بکەن و ئەنجامدەرانی بۆ ڕای گشتی ئاشکرا بکەن. لای بەڕێزتان ئاشکرایە، لە مێژووی خەباتی سیاسی کورددا، هەمیشە دوژمنان، ویستوویانە لە رێگەی تیرۆر و ڕەشە کوژییەوە خەباتی ئازادیخوازانەی گەلەکەمان سەر کوت بکەن. بەڵام هەمیشە خەباتی ڕەوای کورد بۆ ئازادی، لە گەشەکردن و بەرفراوانیدا بووە. نەمری و سەربەرزی بۆ شەهیدانی ڕێگای ڕزگاریی گەلەکەمان. نەفرەت لە تیرۆرستان.
هەروەها مەکتەبی سیاسی پارتی دێموکراتی کوردستان لە ڕاگەیاندراوێکدا، وێڕای مەحکوم کردنی تەقینەوەکانی شەوی یەڵدا دەڵێ ، ئامانج لەو کردەوەیە بشێوى و تێكدانى سەقامگیری و ئارامیی هەرێمی كوردستانە . لە پەیامەکەی پارتی دیموکراتی کوردستاندا هاتووە”ئێمە وێڕاى سەرەخۆشیمان لە كەسوكارى شەهیدەكان و هیواى چاكبوونەوە بۆ بریندارەكان، ئەو كارە نەخوازراوانە كە ئامانجیان بشێوى و تێكدانى سەقامگیری و ئارامی هەرێمی كوردستانە، زۆر بە توندى ئیدانە و سەرزەنشت دەكەین و، هاوخەمى خۆمان بە خوشك و برا و كەسوكارى قوربانیەكان و تێكۆشەرانی حیزبی دێموكراتی كوردستان، رادەگەیێنین و، هیواخوازین لەمەودوا ئەو رووداوانە دووبارە نەبنەوە و زیاتر ئارامیی و ئاسایشى هەموولایەك پارێزراوتر بێ.
پهرلمانتارانی فراكسیۆنی پارتی له پهرلهمانی كوردستان، بە شەرمەزار کردنی تەقینەوەکانی بەر دەم یەکێک لە بنکەکانی “حیزبی دیموکراتی کوردستان” دەڵێن ، مەبەست لەو كردهوانه شێواندنی هێمنی و ئاسایشی ههرێمی كوردستانه، و هیوادارین دووباره نهبنهوه و داواشیان لە هێزه ئهمنییهكان کردوە بهوپهڕی بهرپرسیارێتییهوه ئهركی خۆیان جێبەجێ بکەن و ئەنجامدەرانی ئەو كردەوانە دەستگیر بكەن.
لە بەردەوامیی شەپۆلی هاوخەمی لە گەڵ حیزبی دێموکراتی کوردستان لایەنە سیاسییەکانی پارچەکانی دیکەی کوردستان لە باکوور و رۆژئاوای کوردستان جیاجیا بە ناردنی نامە وبرووسکەی تایبەت ، هێرشی تێرۆریستی بۆ سەر بنکەی وبارەگاکانی حدک یان بە توندی مەحکووم کردوەو، داواکارن کە بە زووترین کات ئەنجامدەرانی ئەو پەلامارە نامرۆڤانەیە بە ڕای گشتی بناسرێن.
شووورای میللی مقاومەتی ئێران، لە ڕاگەیاندراوێک دا وێڕای هاوسۆزی و هاوخەمیی دەربڕێن لە گەڵ حیزبی دێموکراتی کوردستان و کەسوکارەی شەهیدانی یەڵدای خوێناویی، بە توندی ئەو هێرشکردنەی بۆ سەر پەنابەرانی سیاسی لە نێو خاکی هەرێمی کوردستان مەحکووم دەکا و داوای لە بەرپرسانی باڵای هەرێمی کوردستان کردوە کە بەتوندوتۆڵی پێش لە دووپات بوونەوەی رووداوی لەو چەشنە بگرن و هەروەها داوای لە ڕێکخراوی نەتەوە یەکگرتووەکان کردووە بە سەرنجەوە ئاگایان لە مافی پەنابەرانی کوردی رۆژهەڵات لە هەرێمی کوردستان هەبێ.
رێکخراوی داکۆکیکاری مافی مرۆڤی کوردستان بە بڵاوکردنەوەی راگەیاندراوێک وێڕای مەحکووم کردنی کردەوەی تێرۆریستی بۆ سەر حیزبی دێموکراتی کوردستان و شەهید و بریندار بوونی چەند پێشمەرگەو کادری ئەو حیزبە لە گەڵ دوو کارمەندی ئاسایشی شاری کۆیە ، ئەو پەلامارە نامرۆڤانەیەی مەحکووم کردووە و ڕایگەیاندوە؛ رێکخراوی داکۆکیکاری مافی مرۆڤی کوردستان هەرچەشنە کوشتن و لە ناوبردنی ئوپوزسیون لە هەر ڕیگایەکەوە رەت دەکاتەوە و دژ بە بنەماو پڕنسیپەکانی مافی مرۆڤی دەزانێ.
کۆمیتەی ڕێکخراوی “یاری” کورد بە دەرکردنی بڵاوکراوەیەک و ئیدانەی کردەوە تێرۆریستییەکەی شەوی یەڵدا ڕایگەیاند: ئێمە وەکوو کومیتەی ناوەندی رێکخراوی یاری کوردەوە ئەم کردەوە تیرۆریستیە بە تووندی مەحکووم دەکەین و هیوادارین کە لایەنە پەیوەندیدارەکان لە هەرێمی کوردستان بە جدی لێکوڵینەوە لە سەر روداوەکە بکەن بۆ ئەوەی بە ئەنجامێکی باش بگەن.
ئەو لایەن و کەسایەتییە سیاسیانەی کە لە سێهەمی رۆژدا و تا ئەم کاتە هاوخەمی خۆیانیان لە گەڵ حیزبی دێموکراتی کوردستان دەربڕیوە برتین لە؛
- بەرەی دیموکراتیکی ئیران
- کۆدار
- نوێنەرایەتی پەیەدە لە هەرێمی کوردستان
- سکرتێری حیزبی بەیت نەهرەین لە هەرێمی کوردستان
- نوێنەری هاوپەیمانیی دیموکراتی نیشتمانی کورد لە سووریە
- الهيئة القيادية لحزب آزادي الكوردستاني
- المكتب السياسي للحزب الجمهوري الكوردستاني
کەسایەتیەکان؛
- دوکتور مەحموود عوسمان کەسایەتی سیاسی کورد
- هونەرمەندی گەورەی کورد مامۆستا مەزهەر خالقی
- کۆمەڵێک لە پارلمنتارانی کورد لە پاڕلمانی کوردستان و پاڕلمانی عێراق.