یەکیەتی لاوانی دێموکراتی ڕۆژهەڵاتی کوردستان راگەیەندراوێکی سەبارەت بە تەقینەوەی تێرۆریستی لە بەردەم بنکەی دەفتەری سیاسی حیزبی دێموکراتی کوردستان بڵاوکردەوە.

بۆ رای گشتیی!

هەمووساڵێ رێکەوتی 20ی دێسامبر وەک نەریتی ساڵانە یەکیەتیی لاوانی دێموکراتی رۆژهەڵاتی کوردستان یادی لەدایکبوونی رێبەری هەڵکوتووی کورد دکتوور قاسملوو دەکاتەوە، ئەمساڵیش وەک ساڵانی پێشوو شەوی سێ شەمە لەسەر چوارشەمە ئەم یادە لەناو ئاپۆڕای تێکۆشەرانی دێموکرات و کادر و ئەندامانی یەکیەتیی لاوان لە بنکەی دەفتەری سیاسی حیزبی دێموکرات کرایەوە کە بەداخەوە تووشی هێرشی تێرۆریستی رێژیمی ئێران هات.

بەکرێگیراوانی کۆماری ئیسلامی دوابەدوای کۆتایی هاتنی رێوڕەسمەکە و بڵاو بوونی خەڵکەکە، دوو بۆمبیان لە دووکاتی جیاوازدا بەرووی خەڵکدا تەقاندەوە کە بەداخەوە بوو بە هۆی شەهید بوونی ٦ هاوڕێی ئازیزو بریندار بوونی چواری دیکەش..

شەهیدەکانی ئەم ڕووداوە بریتین لە:

1- عەلی قۆیتاسی، کادری حیزبی دێموکرات

2- وەهاب میر خزری، کادری حیزبی دێموکرات

3- سالار باقری، پێشمەرگەی حیزب و ئەندامی یەکیەتیی لاوان

4- ئەرسەلان عەباس نیا، پێشمەرگەی حیزبی دێموکرات

5- ناسر کەریمی، کادری یەکیەتیی لاوان

6- عەدنان عەبدوڵلا، مفەوەزی ئاسایش

ئێمە وێڕای مەحکوم کردنی ئەم کردەوە تێرۆریستیە وەبیر هەموو کۆڕ و کۆمەڵە نێونەتوەییەکان دێنینەوە کە کۆماری ئیسلامی ئێران دەمێکە دەستی کردوە بە هەڕەشەی لەناوبردنی ئۆپۆزیسیۆن و هیچکاتیش بۆ لەناوبردنی نەیارانی خۆی دەستی لە هیچ شتێک نەپاراستوە و تێرۆری کردۆتە پیشەی خۆی، هەر بۆیە بانگەواز لە کۆڕ و کۆمەڵە نێونەتەوەییەکان دەکەین کە رێژیمی ئێران سەبارەت بەم کردوە تێرۆریستیە و باقی کردەوەکانی دیکەی مەحکوم بکەن و هەروەها بانگەواز لە ئەندامان و لایەنگرانی یەکیەتیی لاوان دەکەین کە لە وڵاتانی ئورووپایی بۆ مەحکوم کردنی رێژیمی ئێران لە هەموو شێوازێکی مەدەنی کەڵک وەربگرن و دەنگی مافخوازنەی ئازادیخوازنی کورد و روخساری تێرۆریست پەروەری رێژیمی ئێران بە جیهانیان نیشان بدەن.

روحی شەهیدان شاد بێ و سەنگەری خەباتیان ئاوەدان

سێبوری و سەربەرزی بۆ بنەماڵە و کەسوکاری شەهیدان

٢١/١٢/٢٠١٦

سکرتاریای یەکیەتیی لاوانی دێموکراتی رۆژهەڵاتی کوردستان